حکومەتی عێراق دەست بە ڕێکارەکانی هەناردەکردنەوەی نەوتی کوردستان دەکات

ئاڤا نیوز

حکومەتی عێراق پێش سەردانەکەی سوودانی بۆ ئەمریکا، دەست بە ڕێکارەکانی هەناردەکردنەوەی نەوتی هەرێمی کوردستان دەکات، دوو تیمی هونەری و یاسایی دەنێرێتە هەولێر و هەڵسەنگاندن بۆ کێڵگەکان و گرێبەستەکان دەکەن.

وێنە گەورەکە: وەزارەتی نەوتی عێراق بڕیاری داوە دوو تیمی هونەری و یاسایی پێکبهێنێت، بۆ ئه‌وه‌ی پێش سه‌ردانی سوودانی بۆ ئه‌مریكا سەردانی هەرێمی كوردستان بكه‌ن،  له‌ سه‌ردانه‌كه‌دا له‌گه‌ڵ کۆمپانیا وەبەرهێنەرەکانی نەوت کۆدەبنەوە و هەڵسەنگاندن بۆ دۆخی سەرجەم کێڵگە نەوتییەكانی هه‌رێمی كوردستان دەكه‌ن.

لێدوانی فه‌رمی: ئامانجی سەردانی تیمەکان هەڵسەنگاندنە بۆ بڕی بەرهەم و تێچووی دەرهێنانی نەوت و قەبارەی وەبەرهێنان لە کێڵگەکاندا. لەم ڕووەوە ڕاپۆرتێک بۆ وەزارەتی نەوت و ئەنجوومەنی وەزیران ئامادە ده‌كه‌ن، بۆ چاره‌سه‌ركردنی كێشه‌ی هه‌نارده‌كردنه‌وه‌ی نه‌وت. نه‌هرۆ ڕ‌واندزی، جێگری سه‌رۆكی لیژنه‌ی نه‌وت و غاز له‌ په‌رله‌مانی عێراق وای به‌ ئاڤا نیوز گوت. 

بۆچی گرنگه‌:  یەکێک لە ئەجێنداکانی کۆبوونەوەی نێوان محەممەد شیاع سوودانی، سەرۆکوەزیرانی عێراق و جۆ بایدنی سەرۆکی ئەمریکا کێشەکانی نێوان هەولێر و بەغدایە، بەتایبەتی پرسی دەستپێکردنەوەی هەناردەکردنی نەوتی هەرێمی کوردستان، مووچە و بودجە. 

باكگراوند: بەهۆی بڕیارەكەی دادگه‌ی ناوبژیوانی پاریس زیاتر لە ساڵێکە هەناردەكردنی نەوتی هەرێمی كوردستان بۆ بەندەری جەیهانی توركیا ڕاگیراوە، زیانەکەیشی بە نزیکەی 12 ملیار دۆلار دەخەمڵێنرێت.