بافڵ تاڵەبانی: شەرمەزارییە لە 2025 باسی شەڕ و شۆڕ بکرێت

ئاڤا نیوز

بۆ یەکەمجار، دوای هێرشی هێزەکانی یەکێتی بۆ سەر لالەزار و کوژران و برینداربوون و سووتان و بێسەروشوێن بوونی دەیان کەس، بافڵ تاڵەبانی، سەرۆکی یەکێتی لە کۆنگرەی حیزبە سۆسیال دیموکراتەکان ڕایگەیاند: ڕۆژهەڵاتی ناوەڕاست لەبەردەم چەندین ئاڵنگاریدایە، شەرمەزارییەکی زۆرە لە ساڵی 2025 باسی ئەو ئاڵانگارییانە دەکەم. 

چیرۆکی سەرەکی: ماوەی دوو ڕۆژە لە شاری سلێمانی کۆنگرەی حیزبە سۆسیال دیموکراتەکان بەڕێوەدەچێت، لە ئێستادا سەرۆکایەتیی ئەم هاوپەیمانیەتییە لەلایەن حیزبی میسری ئیجتیماعی دیموکراتی میسرییەوە بەڕێوەدەبرێت، بەڵام لە کۆتایی کۆنگرەکەدا بافڵ تاڵەبانی ئەم پۆستە وەردەگرێت.

لێدوانی فەرمی: بافڵ تاڵەبانی، سەرۆکی یەکێتیی نیشتمانیی کوردستان لەمیانی وتارێکدا کە لە کۆنگرەکە پێشکەشیکرد باسی لەوەکرد: لە شاری سلێمانی بۆچوونەکان ئازادانە گوزارشتیان لێ دەکرێت و هەمیشە دیالۆگ بەسەر بێدەنگیدا سەردەکەوێت، کۆمەڵگەی ئێمە بەهێزتر دەبێت کاتێک ئازاد بێت و هەمووان جێگەیان ببێتەوە و دادپەروەر بێت.

بافل تاڵەبانی باسی دۆخی ئەمنی و شەڕ و ململانێکانی کرد و گوتی: ڕۆژهەڵاتی ناوەڕاست لەبەردەم چەندین ئاڵنگاریدایە، ئەو ئاڵنگاریانە تاقیکردنەوەن ئاخوە ئێمە تا چ ئاستێک دەتوانی دان بەخۆماندا بگرین، هێشتا چەندین وڵات و دەیان ملیۆن کەس بەدەست جەنگ و ململانێکان دەناڵێنن، شەرمەزارییەکی زۆرە لە ساڵی 2025 باسی ئەو ئاڵنگارییانە دەکەم.

وڵاتانی ڕۆژئاوا و یەکێتی ئەوروپا چۆن جورئەت دەکەن باسی دیموکراسی و مافی مرۆڤ بکەن کاتێک  ڕێگە دەدەن ئەو ستەم و تۆقاندنە لە غەززە بکرێت.

ئێمە لە کوردستان دەزانین باجی شەڕ چیە و دەزانین خەڵاتی ئاشتی چییە، خەڵکی ئێمە کۆڵنادات بۆ دروستکردنی کۆمەڵگایەکی دیموکراسی، بۆیە  ئێمە دەنگێک دەبین بۆ ئاشتی و دیموکراسی و دادپەروەری.

لەلایەکی دیکەوە: بڕیاربوو نێچیرڤان بارزانی، سەرۆکی هەرێمی کوردستان، بەشداریی لە کۆنگرەکەدا بکات، بەڵام بەرنامەی کارەکەی هەڵوەشایەوە و بەشداریی نەکرد.