دوای دوو ڕۆژ ئاگرە بەهێزەکەی پێنجوێن کۆنترۆل کرا

ئاڤا نیوز

دوای دوو ڕۆژ و بە بەشداری دەیان کەس لە کارمەندانی بەرگریی شارستانی و کەسانی خۆبەخش، قایمقامی پێنجوێن لەڕێگەی ئاڤاوە کۆنترۆلکردنی ئاگرەکەی سنووری گوندەکانی هەڵاڵاوا و مەسۆی ڕاگەیاند.

چیرۆكی سەرەكی: ڕۆژی پێنجشەممە 28-8-2025، ئاگرێك لە دەورووبەری هەردوو گوندی هەڵاڵاوا و مەسۆ لە سنووری قەزای پێنجوێن كەوتەوە، بەو هۆیەوە ڕووبەڕێكی گەورەی پووش و پاوان و داری سرووشتی سووتان و دوای چەند كاتژمێرێك كۆنترۆڵ كرا و دامركایەوە، بەڵام دوێنێ هەینی جارێكی دیكە سەری هەڵدایەوە و بەو هۆیەوە تاوەكو ئێستا دوو كەس سووتاون و گواستراونەتەوە بۆ نەخۆشخانە.

لێدوانی فەرمی: هێمن ئیبراهیم، قایمقامی پێنجوێن بە ئاڤای ڕاگەیاند، "ئاگرە بەهێزەکەی پێنجوێنمان کۆنترۆڵ کرد، سوپاسی ئاڤا میدیا دەکەم کە بە درێژایی دوو ڕۆژی ڕابردوو ڕووماڵێکی زۆر خێرای ئاگرەکەی کرد و هەموو لایەکی ئاگادار کردەوە."

- ئێستا تیمەکان چاودێری دۆخەکە دەکەن، بەهۆی پاشماوەی پشکۆ و بەهێزی با ئەگەری دووبارە ئاگرکەوتنەوە هەیە.

هۆکارە زانراوەکان: ئەگەرچی هێشتا بەفەرمی ڕانەگەیێنراوە هۆکاری سەرەکی کەوتنەوەی ئاگرەکە چی بووە، بەڵام کەسێک بە تۆمەتی هەڵكردنی ئاگرەكە دەستگیر كراوە و پەڕاوی لێكۆڵینەوەی بۆ كراوەتەوە، كەسەكە خەڵكی گوندی هەڵاڵاوایە.