ڕوونکردنەوەیەک لە هەژماری منەوە بۆ ئەو مووچەخۆرانەی کارتی بانکییان کارا نەکراوە

ئاڤا نیوز

بەشێك لە بەشداربووانی پرۆژەی "هەژماری من" ساڵێك زیاترە كارتی هەژمارەكەیان وەرگرتووەتەوە، بەڵام تا ئێستا كارا نەبووە، تیمی "هەژماری من" ڕوونکردنەوە دەدات و دەڵێت، "لە ئایندەیەکی نزیک کێشەکە چارەسەر دەکەین." 

ئەوەی پێویستە بیزانیت: ئەم هەفتەیە 465 هەزار و 600 مووچەخۆر لەڕێگەی ئامێرەکانی ئای تی ئێم مووچە وەردەگرن، تاوەکو ئێستاش لەکۆی نزیکەی یەک ملیۆن مووچەخۆر، 900 هەزاریان تۆمارکراون.

زانیاریی زیاتر: نزیکەی 75 هەزار مووچەخۆر هەرچەندە کارتی بانکییان پێدراوەتەوە، بەڵام ناتوانن مووچەی پێ ڕابکێشن، بەشێک لەو مووچەخۆرانە زیاتر لە ساڵێکە کارتەکانیان وەرگرتووەتەوە.

لێدوانی فەرمی: تیمی "هەژماری من" بە ئاڤایان وت، هۆکاری ئەکتیڤ نەکردنی ئەو کارتانە بۆ دانانی ئەی تی ئێم لەلایەن بانکەکان دەگەڕێتەوە، چونکە بۆ یەک هەزار مووچە خۆر، یەک ئامێر دادەنرێت، بەگوێرەی ڕێژەی مووچەخۆران ئامێر دانەنراوە.

لەبارەی چارەسەرکردنی ئەو کێشەیە، تیمی "هەژماری من" ڕایانگەیاند، "لە چەند هەفتەی داهاتوودا ئەو کێشەیە بەتەواوەتی چارەسەر دەکەین و کارتەکان کارا دەبن".