دوو شاندی كوردستان دەچن بۆ بەغدا؛ ئامادەکاریی دەکرێت بۆ ڕێککەوتنێکی سێ لایەنە

ئاڤا نیوز

بڕیارە ئەم هەفتەیە دوو شاندی کوردستان سەردانی بەغدا بکەن بە مەبەستی ڕێککەوتن لەبارەی نەوت و داهاتی ناوخۆ و مووچەی مانگەکانی داهاتوو. ئامادەکاری دەکرێت بۆ ڕێککەوتنێکی سێ لایەنە.

وێنە گەورەکە: حکومەتی هەرێمی کوردستان چەندین جار ئامادەیی خۆی بۆ هەناردەکردنەوەی نەوت و چارەسەرکردنی کێشەکانی پەیوەست بە داهاتی ناوخۆ دەربڕیوە، بەڵام داواکاریی کۆمپانیا بەرهەمهێنەرەکانی نەوت کە لە کوردستان کار دەکەن وەکو بەربەستی سەرەکی بەردەم هەناردەکردنەوەی نەوەت دەبینرێت، چونکە داوای گەرەنتی لە بەغدا دەکەن بۆ پێدانی شایستە داراییەکانیان و تا ئێستا ئەو گەرەنتییەیان پێ نەدراوە.

زانیاریی تایبەت: سەرچاوەیەک لە ئەنجوومەنی وەزیرانی عێراق بە ئاڤای ڕاگەیاند، سبەی سێشەممە شاندێکی کوردستان سەردانی بەغدا دەکات و لەسەر دۆسیەی نەوت گفتوگۆ دەکات و لەگەڵ وەزارەتی نەوت کۆدەبێتەوە. ئەگەر هیچ گرفتێک بۆ گفتوگۆکە درووست نەبێت، ئامادەکاری دەکرێت بۆ ڕێککەوتنێکی سێ لایەنە لەنێوان وەزارەتی سامانە سرووشتییەکانی کوردستان و وەزارەتی نەوتی عێراق و کۆمپانیا بەرهەمهێنەرەکانی نەوت لە هەرێمی کوردستان.

شاندەکەی دیکە ڕۆژی پێنجشەممە کاتژمێر 9:30ی بەیانی کۆبوونەوەیان لە بەغدا هەیە، ژمارەی شاندەکەش چوار بۆ پێنج کەسن.

ئەگەرچی ڕۆژی پێنجشەممە لە عێراق و هەرێمی کوردستان بەبۆنەی یادی لەدایکبوونی پێغەمبەر (د.خ) پشووە، بەڵام کۆبوونەوەی شاندەکە لەگەڵ بەغدا هەر دەکرێت.

زانیاریی زیاتر: ئەو کۆبوونەوەیەی ڕۆژی پێنجشەممە دەکرێت لەبارەی داهاتی نانەوتییە. ئەم بابەتە بەربەستی گەورەی ئەم چەند مانگەیە و پێویستە لەم هەفتەیەدا یەکلایی ببێتەوە.

هەنگاوی داهاتوو: ئەگەر هەولێر و بەغدا نەگەیشتنە ڕێککەوتن، ئەو کاتە پرسیار ئاراستەی ئەنجوومەنی دەوڵەت دەکرێت، ئەو ئەنجوومەنە پێشتر ناوی ئەنجوومەنی شورا بوو.

پرسیارەکەش ئەوەیە، ئایا مەبەست و ڕوونکردنەوەی یاسایی بۆ ئەم ماددەیە چییە کە پەیوەندی هەیە بە داهاتی نانەوتی؟

کاتێک ئەنجوومەنی دەوڵەت وەڵامی دایەوە و ڕوونکردنەوە یاساییەکەی دا، پێویستە هەردوولا، واتا هەرێمی کوردستان و بەغدا پابەندی ئەو ڕوونکردنەوە یاساییە بن.

هەر بەپێی سەرچاوەکەی ئەنجوومەنی وەزیرانی عێراق کە بە ئاڤای ڕاگەیاندبوو، تا ڕادەیەک ئاسانکاری بۆ تێگەیشتن لەسەر ئەم بابەتە لەنێوان هەرێمی کوردستان و بەغدا دروست بووە و ئەگەر هەیە نەکەوێتە پرسیارکردن لە ئەنجوومەنی دەوڵەت.

ئەوەی پێویستە بیزانیت: چارەنووسی مووچەی مانگەکانی حەوت و هەشت و مانگەکانی دواتر گرێدراوە بەم دوو کۆبوونەوەیە. بۆ ئەوەی مووچەی مانگەکانی داهاتوو کێشەی بۆ دروست نەبێت، دەبێت ئەم هەفتەیە ئەم دوو دۆسیەیە بە لایەکدا بکەوێت.