هەفتەی داهاتوو پرسی شەش مووچە و 12 مووچەکە یەکلایی دەکرێتەوە

ئاڤا نیوز

لیستی ئەو خانەنشینانەی ئیکرامییەی 12 مووچەکە دەیانگرێتەوە لەبەغدایە، خانەنشینان چاوەڕێی خەرجکردنی دەکەن و بەڕێوەبەرایەتی گشتیی خانەنشینیش دەڵێت: "هەفتەی داهاتوو یەکلایی دەبێتەوە."

وێنە گەورەکە: خانەنشینانی نوێی کوردستان 18 مووچە وەردەگرن جگە لەمووچەی مانگانەیان، شەش مووچە بە مەرجی 15 ساڵ خزمەت و 180 ڕۆژ مۆڵەتی کۆکراوە، لەلایەن حکومەتی هەرێمی کوردستان دابین دەکرێت، 12 مووچەکە مەرجی 25 ساڵ خزمەتە و لەسەر وەزارەتی دارایی عێراقە.

زانیاریی تایبەت: سەرچاوەیەک لە بەڕێوەبەرایەتیی گشتیی خانەشینی هەرێمی کوردستان بە ئاڤای وت، "نووسراومان بۆ شەش مووچە و 12 مووچە کردووە و چاوەڕێی وەڵامی وەزارەتی دارایی عێراقین، هەفتەی داهاتوو پرسەکە یەکلایی دەکرێتەوە، یان ئەوەتا لەلایەن بەغداوە وەڵامی نووسراوەکە دەدرێتەوە، یان شاندێکی ئێمە بۆ یەکلایی کردنەوەی پرسەکە دەچێتە بەغدا."

ئەوەی پێویستە بیزانیت: بە وتەی ئەو سەرچاوەیە، لە ئەگەری خەرجنەکردنی لەلایەن وەزارەتی دارایی عێراق، دابەشکردنی لەسەر داهاتی ناوخۆی هەرێمی کوردستان یەکێک دەبێت لە بژاردەکان.