تاوەکو ناوەڕاستی ئەم مانگە بەشی یەکەمی پارە گەنمی جووتیاران خەرج دەکرێت

ئاڤا نیوز


لە بەغداوە ڕەزامەندی دراوە لەسەر خەرجکردنی بڕێک پارە وەک شایستەی دارایی جووتیاران، تاوەکو ئێستا پشکی هەرێـمی کوردستان نەنێردراوە و بڕیارە تا ناوەڕاستی ئەم مانگە بەشی یەکەمی پارەکە خەرج دەکرێت.

وێنە گەورەکە: زیاتر لە دوو مانگە جووتیارانی هەرێمی کوردستان، لەڕێگەی سایلۆکانی پارێزگاکانەوە نزیکەی 400 هەزار تۆن گەنمیان ڕادەستی وەزارەتی بازرگانی عێراق کرد، دوو بەشی پارەکە بۆ جووتیارانی پارێزگاکانی عێراق خەرجکراوە، تەنیا ئەوەی هەرێمی کوردستان نەنێردراوە.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "بڕیاری خەرجکردنی 500 ملیار دیناری دیکە وەک شایستەی دارایی جووتیاران دراوە، ئەو جووتیارانە دەگرێتەوە کە لە مانگی شەشەوە گەنمیان ڕادەستی سایلۆکان کردووە، ڕەزامەندی وەگیراوە بە ئەگەری زۆرەوە پێش ناوەڕاستی ئەم مانگە بەشی یەکەمی شایستەی دارایی جووتیاران خەرج دەکرێت."

ژمارەکان وادەڵێن: 310  ملیار دینار وەک پشکی هەرێمی کوردستان بەگوێرەی ئەو 390 هەزار تۆن گەنمەی لە جووتیارانی هەرێمی کوردستانی وەرگیراوە، بەمشێوەیە بەسەر چوار پارێزگاکەی هەرێمی کوردستان دابەشدەبێت:-

هەولێر: 122 هەزار و 600 تۆن ڕادەستکراوە شایستەی دارایی جووتیاران نزیکەی 98 ملیار دینارە.

سلێمانی:  145 هەزار و 567 تۆن گەنم ڕادەستکراوە دەکاتە نزیکەی 111 ملیار دینار.

دهۆک:  117 هەزار و 911 تۆن ڕادەستکراوە دەکاتە نزیکەی 92 ملیار دینار.

هەڵەبجە:  13 هەزار و 923 تۆن ڕادەستکراوە دەکاتە نزیکەی 10 ملیار دینار.