ڕۆژنامەیەکی ئەمریکی: ئەگەر ئێران لە سەرپێچییە ئەتۆمییەکان بەردوام بێت دووبارە هێرشی دەکرێتەوە سەر

ئاڤا نیوز

ڕۆژنامەی واشنتن پۆستی ئەمریکی دەڵێت، ئەگەر ئێران بەردەوام بێت لە سەرپێچییە ئەتۆمییەکان، ئەوا ئەمریکا دووبارە هێرشی سەربازی دەکاتەوە سەر.

 

بڵاوکراوەی فەرمی: بەپێی ڕاپۆرتێکی ڕۆژنامەی واشنتن پۆست، "ئەگەر ئێران لە سەرپێچییە ئەتۆمییەکانی بەردەوام بێت و دەستهەڵنەگرێت لە چەکی ئەتۆم، ئەوە دوور نییە دووبارە ئەمریکا هێرش بکاتەوە سەر تاران و بەرنامە ئەتۆمییەکەی بکرێتە ئامانج".

 

ئەوەی پێویستە بیزانیت: بەشێک لە وڵاتە ئەورووپییەکان، ئیسرائیل و ئەمریکا بەهەموو شێوەیەک دژی ئەوەن ئێران ببێتە خاوەن چەکی ئەتۆمی، هەرچەندە ئێران چەندین جار باسی لەوە کردووە کە ئامانجی وڵاتەکەیان لە پیتاندنی یۆرانیۆم بۆ پێداویستییە ناوخۆییەکان و بواری ئاشتییە، بەڵام ئەو وڵاتانە باوەڕ بە ئێران ناکەن و ڕێگری لە هەموو جۆرە هەوڵێک دەکەن کە ئێران بیدات بۆ ئەوەی ببێتە خاوەنی چەکی ئەتۆمی.

 

زانیاریی زیاتر: تاوەکوو پێش هێرشەکەی ئەمریکا بۆ سەر ناوەندە ئەتۆمییەکانی، ئێران ڕێژەی پیتاندنی یۆرانیۆمی پاکی گەیاندبووە زیاتر لە 60٪، هەندێک ڕاپۆرتیش بڵاویان کردبووەوە کە ئێران خاوەنی 160 کیلۆگرام یۆرانیۆمە.

 

باکگراوند: مانگی شەشی ئەمساڵ ئیسرائیل هێرشی کردە سەر ئێران و جگە لە بۆردوومان کردنی بنکە ئەتۆمییەکانی، هاوکات چەندین فەرماندەی سەربازیی ئەو وڵاتەشی کردە ئامانج. دواتریش ئەمریکا هاتە پاڵ ئیسرائیل و لەژێر ناوی ئۆپەراسیۆنی "چەکووشی نیوەشەو" سێ بنکەی ئەتۆمیی ئێرانی بۆردوومان کردن کە بریتی بوون لە: بنکەی فۆردۆ، نەتەنز و ئەسفەهان.