وەزارەتی دارایی: جگە لە موڵکەکانی شاسوار عەبدولواحید دەستمان بەسەر موڵکی ژمارەیەک کۆمپانیای دیکەشدا گرتووە

ئاڤا نیوز

وەزارەتی دارایی و ئابووریی کوردستان لەبارەی دەستبەسەرداگرتنی موڵکەکانی شاسوار عەبدولواحید، سەرۆکی جووڵانەوەی نەوێ ڕوونکردنەوە دەدات و ڕایدەگەیێنێت، تەنیا ئەو نییە، بە بەهای 110 ملیار دینار دەستیان بەسەر موڵکی ژمارەیەک کۆمپانیای دیکەشدا گرتووە، لە ماوەی چەند ساڵی ڕابردووشدا بڕی 25 ملیار دینار بە کاش لە ژمارەیەک کۆمپانیا وەرگیراوەتەوە.

ڕاگەیێنراوی فەرمی: وەزارەتی دارایی و ئابووری هەرێمی کوردستان ڕایگەیاندووە: دەستبەسەرداگرتنی موڵکەکانی شاسوار عەبدولواحید یاساییە، دوای یەکلابوونەوەی دۆسیەکە لە دادگا بە قازانجی وەزارەت، موڵکە دەستبەسەرداگیراوەکان لە زیادکردنێکی ئاشکرادا دەفرۆشرێن.

زانیاریی زیاتر: وەزارەتی دارایی ڕوونی کردووەتەوە:

- قەرزەکان بە ناوی کۆمپانیای نالیا و چاڤییەوە وەرگیراون، بۆیە ڕێکكاری یاسایی بەرامبەر کۆمپانیاکان دەگیرێتەبەر نەک خاوەن کۆمپانیا، گۆڕینی خاوەندارێتی کۆمپانیا کاریگەری لەسەر قەرز و پابەندییەکان نابێت.

- قەرزەکان لە ساڵانی 2010 و 2011 وەرگیراون و بڕیار بوو لە ماوەی دوو ساڵدا بگەڕێنرێنەوە، بەڵام نەگەڕێنراونەتەوە، دۆسیەکە لە ساڵی 2015ـەوە لە دادگا بووە و لە 2021 بە قازانجی وەزارەت یەکلایی بووەتەوە.

- کۆمپانیاکان بەدەر لە یاسا بارمتەکانیان چەند جارێک گۆڕیوە، دواجار چوار پارچە زەوییان وەک بارمتە داناوە کە لە بنەڕەتدا سەوزایی و خزمەتگوزاری بوون و نایاسایی بوون. دوای ڕاستکردنەوەی پێشێلکارییە یاساییەکان و وەرگرتنی بڕیاری کۆتایی لە دادگا، 60 موڵک دەستنیشانکراون کە شایستەی فرۆشتنن.


گۆشەیەکی دیکە: وەزارەتی دارایی ڕوونی کردووەتەوە: بەپێی بڕیاری دادگا و بەڵگەنامە یاساییەکان کار دەکەن، لە چەند ساڵی ڕابردوودا بە بەهای زیاتر لە 110 ملیار دینار موڵک دەستی بەسەرداگیراوە و 25 ملیار دیناری قەرزیس بە کاش گەڕێنراوەتەوە بۆ خەزێنەی گشتی.


لێدوانی فەرمی: لە وەزارەتی دارایی و ئابووریی هەرێمی کوردستان بە ئاڤایان وت: ئەو موڵکانەی بە بەهای زیاتر لە 110 ملیار دینار دەستیان بەسەرداگیراوە هی شاسوار عەبدولواحید و کۆمپانیاکانی نین، بەڵکو هی کۆمپانیای ترن، ئەو 25 ملیار دینارەیشی لە ساڵانی دیکە بە کاش وەرگیراوەتەوە، بەهەمانشێوە هی کۆمپانیاکانی شاسوار عەبدولواحید نین، بەڵکو لە کۆمپانیای دیکە وەرگیراونەتەوە.

لەلایەکی دیکە: شاسوار عەبدولواحید 80 سکاڵای دیکەی لەسەرە، 10 سکاڵایان جۆراوجۆرن، 70 یان لەسەر پشکەکانی چاڤیلاندن.

 

باکگراوند: شاسوار عەبدولواحید، سەرۆکی جووڵانەوەی نەوەی نوێ لە ماوەی ڕابردوو لەسەر سکاڵای پەرلەمانتارێکی پێشووی حیزبەکەی بەناوی شادی نەوزاد بەتۆمەتی ناوزڕاندن دەستگیر کرا، ئەمڕۆش لەلایەن دادگاوە بە پێنج مانگ زیندانیکردن سزا درا.