هەولێر و بەغدا ڕێککەوتنێکی دیکەیان واژۆ کرد

ئاڤا نیوز

لە بەغدا شاندێكی بازرگانیی و ئابووریی هەرێمی كوردستان لەگەڵ هاوتاكانیان لە حكومەتی عێراق كۆبوونەوە و لەمیانەدا كێشەی سیستمی ئەسیكودا كە ماوەیەك بوو گرفت بوو لەنێوان دۆخی بازرگانیی نێوان هەردوولا چارەسەر بوو.

بۆچی گرنگە: بەهۆی ئەم ڕێککەوتنە، کۆمپانیاکانی هەرێمی کوردستان چیتر پێویستییان بەوە نیە کە ناسنامەی باجی عێراقی لە حکومەتی فیدراڵ دەربهێنن، بەڵکو کۆدی زەریبی هەرێمی کوردستان بەسە بۆ ئەم مەبەستە.

لێدوانی فەرمی: بڵند مەم، بەڕێوەبەری گشتی تۆمارکردنی کۆمپانیاکانی هەرێمی کوردستان، بە ئاڤا میدیای ڕایگەیاند، لە کۆبوونەوەکدا کە بە ئامادەبوونی نوێنەری وەزارەتی ناوخۆ، بەڕێوەبەری گشتی گەشەپێدانی پیشەسازی، بەڕێوەبەری گشتی گومرگ و بەڕێوەبەری کۆنترۆڵی جۆری لە هەرێمی کوردستان، لەگەڵ هاوتاکانیان و سامی سودانی، ڕاوێژکاری سەرۆکوەزیرانی عێراق بەڕێوەچوو، بڕیاری گرنگ درا.

یەکێک لە بڕیارە سەرەکییەکان بریتی بوو لە:

- ڕێککەوتن لەسەر سیستمی "ئەسیکۆدا" کە پێشتر سەرچاوەی ناکۆکی بوو لە نێوان هەردوولا، کاریگەری خراپی لەسەر بازرگانی و ئابووری هەرێمی کوردستان هەبوو.

- بەپێی ڕێککەوتنەکە، لەمەودوا ژمارەی بازرگانیی کۆمپانیاکان (UEN) کە لە 14 ژمارەی بێهاوتا پێکدێت، دەکرێتە بنەما بۆ بەشداریکردن لە سیستمی "ئەسیکۆدا".

زانیاریی زیاتر: بەپێی ڕێککەوتنەکە، کۆمپانیاکانی هەرێمی کوردستان چیتر پێویستییان بە ناسنامەی باج (هویەی زەریبی) نابێت، کۆمپانیاکانی کوردستان دەتوانن وەک کۆمپانیاکانی ناوەڕاست و خوارووی عێراق، بە شێوەیەکی ئاسایی و یاسایی کاری هاوردە و هەناردەی خۆیان ئەنجام بدەن.