گەشتی ڕاستەوخۆی نێوان عێراق و سەڵتەنەی عومان دەست پێ دەکات

ئاڤا نیوز

 

ڕۆژی شەممەی داهاتوو گەشتی ڕاستەوخۆی نێوان عێراق و سەڵتەنەی عومان دەست پێ دەکات، هاوکات گەشتی بەغدا - ڕیازیش دەکەوێتەکار و گەشتەکانی عێراق - کوەیتیش فراوانتر دەکرێن.

وێنە گەورەکە: ئێستا لە فڕۆکەخانەکانی عێراق و هەرێمی کوردستان ڕۆژانە زیاتر لە 120 گەشتی ئاسمانی ئەنجام دەدرێن، ڕۆژانەش دەوروبەری 765 فڕۆکەی گەشتیاری و بازرگانیی ئاسمانی عێراق بۆ گەشتە نێودەوڵەتییەکانیان بەکاردەهێنن.

 

لێدوانی فەرمی: مەیسەم سافی، وتەبێژی وەزارەتی گواستنەوەی عێراق بە ڕۆژنامەی 'سەباح'ـی ڕایگەیاند، ڕۆژی شەممە (6ی ئەیلول) یەکەمین گەشتی ئاسمانی لەنێوان بەغدا و سەڵتەنەی عومان دەست پێ دەکات کە ئەویش گەشتی بەغدا - سەڵاڵەی عومان دەبێت، هەفتانەش چەندین گەشت لەنێوان فڕۆکەخانەکانی عێراق و عومان ئەنجام دەدرێت.

 

ئەوەشی خستووەتەڕوو، ڕێککەوتن کراوە و ژمارەی گەشتە ئاسمانییەکان لەگەڵ سعودییەش فراوان دەکرێن لەوانەش: گەشتی بەغدا - ڕیاز، هەروەها لەگەڵ کوەیتیش ڕێککەوتن کراوە تا دەروازەی نوێ بدۆزرێتەوە و بۆ گواستنەوەی هاووڵاتیان و ڕێکارەکانی گەشتکردنیش ئاسانتر بکرێن.