زیاتر لە 900 هەزار مووچەخۆر خۆیان لە "هەژماری من" تۆمار کردووە

ئاڤا نیوز

زیاتر لە 900 هەزار مووچەخۆر خۆیان لە پڕۆژەی "هەژماری من" تۆمار کردووە و 450 ئامێری ڕاکێشانی پارەش لە تەواوی کوردستان دانراون.

وێنە گەورەکە: پڕۆژەی هەژماری من بەردەوامە لە فراوانبوون و تاوەکو ئێستا زیاتر لە 900 هەزار مووچەخۆری هەرێمی کوردستان خۆیان لە پڕۆژەکە تۆمار کردووە، پڕۆژەکە هەماهەنگیی تەواوی لەگەڵ بانکی ناوەندیی عێڕاق و حەوت بانکی هاوبەش و ڕێگەپێدراودا هەیە.

لێدوانی فەرمی: سەرچاوەیەک لە تیمی هەژماری من بە ئاڤای ڕاگەیاند: ئەم مانگە زیاتر لە 465 هەزار سوودمەند بوو بە شێوەی دیجیتاڵی و لەڕێگەی 450 ئامێری ڕاکێشانی پارە لە سەرتاسەری هەرێمی کوردستان مووچەکانیان بە "هەژماری من" وەردەگرن. ئەمەش لە پاڵ هەزاران خانەنشین کە لە هەنگاوی تاقیکاریدان.

ژمارەکان وا دەڵێن: ژمارەی سوودمەندانی تۆمارکراو لە "هەژماری من" بەم شێوەیە:

پارێزگای هەولێر: 401 هەزار و 815 مووچەخۆر.

پارێزگای سلێمانی: 278 هەزار و 630 مووچەخۆر.

پارێزگای دهۆک: 220 هەزار و 600 مووچەخۆر.

باکگراوند: سەرۆکوەزیران مەسرور بارزانی، پڕۆژەی "هەژماری من"ـی لە شوباتی ساڵی 2023 ڕاگەیاند، پڕۆژەکە بەشێکە لە ستراتیژیی کابینەی نۆیەم بۆ خزمەتگوزارییە بانکییەکان و کەمکردنەوەی پەیوەندی بە پارەی کاش.