ئەنجوومەنی ڕاژە: نیوەی مامۆستایانی گرێبەستی خوێندنی باڵا بە گەندەڵی دامەزراون

ئاڤا نیوز

دوای وردبینیكردن دەركەوتووە نیوەی ئەو مامۆستایانەی خوێندنی باڵا كە گرێبەستیان بۆ كراوە، شایەن و شایستە نەبوون، واتا بە گەندەڵی گرێبەستیان بۆ کراوە و دامەزراون.

چیرۆکی سەرەکی: لە مانگی 10ـی ساڵی ڕابردوودا، بڕیاری دامەزراندنی گرێبەست بۆ وانەبێژانی سەر بە خوێندنی باڵا دەرچوو، چوار هەزار و 100 مامۆستا دامەزران. دواتر، فایلەکانیان ڕەوانەی ئەنجوومەنی ڕاژە کرا و چەند مانگێکە لیژنەیەک سەرقاڵی وردبینیی زانیاری و بڕوانامە و ئەزموونیانە.

زانیاریی تایبەت: ئاڤا زانیویەتی کە پرۆسەی وردبینی ئەمڕۆ تەواو بووە و وەڵامی نووسراوی ئەنجوومەنی وەزیران ئامادەیە سەبارەت بە شایستەبوونی ئەو مامۆستایانە. بڕیارە هەفتەی داهاتوو وەڵامەکە ڕەوانەی ئەنجوومەنی وەزیران بکرێت.

ئەوەی پێویستە بیزانیت: بەپێی مەرجەکان، مامۆستایانی زانکۆ پێویستە خاوەنی بڕوانامەی ماستەر بن و نازناوی زانستیان هەبێت، بەڵام زیاتر لە نیوەی ئەو کەسانەی دامەزراون ئەو مەرجانەیان تێدا نەبووە، واتە زیاتر لە دوو هەزار کەس شایستەی گرێبەست نین.

پێشتر، ئاڤا بەدواداچوونی بۆ دامەزراندنی بەشێک لە مامۆستایانی زانکۆی ڕاپەڕین کردبوو کە بە ناشایستەیی دامەزرابوون لە ئەنجامدا، لیژنەیەک لە وەزارەتی خوێندنی باڵا پێکهێنرا و ئەنجوومەنی ڕاژەش دەستیکرد بە وردبینی لە فایلەکانیان.

لەلایەکی دیکەوە: چەند ڕۆژێک لەمەوبەر، وەزارەتی خوێندنی باڵا بە ئاڤای ڕاگەیاند کە زیاتر لە هەزار و 200 کەس لەو گرێبەستکراوانە کێشەیان لە دۆسیەکەیاندا هەیە و گرێبەستەکانیان هەڵدەوەشێنرێتەوە.