سۆمۆ: لەگەڵ وەزارەتی سامانە سرووشتییەکان گەیشتووینەتە ڕێککەوتن بۆ هەناردەکردنەوەی نەوت

ئاڤا نیوز

بەڕێوەبەری گشتیی کۆمپانیای بە بازاڕیکردنی نەوتی عێراق (سۆمۆ) ئاشکرای کرد، گەشبینن بەو ڕێککەوتنانەی نێوان هەولێر و بەغدا و ڕاشیگەیاند؛ هەناردەکردنەوەی نەوتی هەرێمی کوردستان پەیوەستە بە کۆمپانیاکانی بەرهەمهێنەر.

وێنە گەورەکە: هەوڵەکانی لەیەکتێگەیشتن و ڕێککەوتنی نێوان هەولێر و بەغدا لەبارەی هەناردەکردنەوەی نەوت و داهاتی نانەوتی بەردەوامن، بۆ ئەو مەبەستەش تائێستا لیژنەکانی هەردوولا چەندین کۆبوونەوەیان کردووە.

لێدوانی فەرمی: عەلی نزار، بەڕێوەبەری گشتیی کۆمپانیای سۆمۆ بە میدیا عێراقییەکانی ڕاگەیاندووە، "لە ڕێککەوتنی وەزارەتی نەوتی فیدراڵی و کۆمپانیای بەبازاڕکردنی نەوت و وەزارەتی سامانە سروشتییەکان لە هەرێمی کوردستان، میکانیزمێکی پتەو بۆ جێبەجێکردنی یاسای بودجە دانراوە، گەشبینین بە ڕێککەوتن و ئەو میکانیزمانەی دانراون، هیوادارین دەست بە هەناردەکردنی نەوتی  هەرێمی کوردستان لە ڕێگەی بۆری جەیهانی تورکیاوە بکەینەوە".

لەلایەکی دیکەوە: فوئاد حوسێن، وەزیری دەرەوەی عێراق، لە بارەی نوێترین گۆڕانکارییەکان سەبارەت بە گفتوگۆكانی نێوان هەولێر و بەغدا دەڵێت: ئەوەی پەیوەندیی هەیە بە داهاتی نانەوتی، هەردوولا زۆر چوونەتە پێشەوە و بە بۆچوونی من لەم ڕۆژانە دەگەینە ڕێککەوتن.