پرۆسەی دەنگدان لە پارێزگاکانی باکووری کوردستان و تورکیا کۆتاییهات

ئاڤا نیوز

 

پرۆسەی هەڵبژاردن لە سەرتاسەری تورکیا و باکووری کوردستان کۆتاییهات و پرۆسەی جیاکردنەوەی دەنگەکان لە بنکەکانی دەنگدان دەستیپێکرد.

 

بۆچی گرنگە؟ پارتە سیاسییەکانی تورکیا کێبڕکێ لەسەر بردنەوەی 81 گەورە شارەوانی و شارەوانی دەکەن، شەڕە گەرمەکە لەسەر گەورە شارەوانیی ئیستەنبووڵە کە ڕەنگە چارەنووسی سەرۆکایەتیی کۆماری داهاتووی تورکیا یەکلایی بکاتەوە.

 

لێدوانی فەرمی: ئەحمەد یەنار، سەرۆکی ئەنجوومەنی باڵای هەڵبژاردنەکانی تورکیا ڕایگەیاند: "پرۆسەکە بە سەرکەوتووی کۆتاییهات و تەنیا چەند ناکۆکییەکی بچووک دروستبوو کە شایەنی باسکردن نییە؛ هیوای زوو چاکبوونەوە بۆ بریندارەکان دەخوازین".

 

ئەوەی پێویستە بیزانیت: دوای ئەنجامدانی کۆبوونەوەیەک ئەنجامی هەڵبژاردنەکان ڕادەگەیێنرێت، بەڵام وادەکەی دیاری نەکراوە؛ بە بەشداری نوێنەری سەرجەم پارتە سیاسییەکانیش پرۆسەی جیاکردنەوەی دەنگەکان دەستپێدەکات. 

 

ئەمەش بزانە: قەدەغەکردنی بڵاوکراوە سیاسییەکان لەسەر ئەنجامی هەڵبژاردنەکان لەسەر پارتە سیاسییەکان هەڵگیرا.

 

باکگراوند: ئەمڕۆ یەکشەممە بە بەشداری زیاتر لە 61 ملیۆن دەنگدەر هەڵبژاردنی شارەوانییەکان لە باکووری کوردستان و تورکیا بەڕێوەچوو کە تێیدا 34 پارتی سیاسی کێبڕکێی بەدەستهێنانی دەنگەکان دەکەن.