دوای پردەکەی کەربەلا، لە نەجەفیش سەقفی چێشتخانەیەک داڕما

ئاڤا نیوز

هێشتا چەند کاتژمێرێک بەسەر ڕووخانی پردەکەی کەربەلا تێنەپەڕیووە، لە پارێزگای نەجەفیش سەقفی چێشتخانەیەک داڕما و بەهۆیەوە لانیکەم کەسێک بە سەختی برینداربوو.

وێنە گەورەکە: لە دروستکردنی باڵەخانە و پڕۆژەکاندا لە عێراق زۆر کات ڕەخنەی ئەوە دەگیرێت کە بەبێ ڕەچاوکردنی سەلامەتی مۆڵەتی کردنەوەیان پێدەدرێت، دواتریش ڕووخان، سووتان و داڕمانی پڕۆژەکان گیانی خەڵکی مەدەنی دەکاتە قوربانیی.

لێدوانی فەرمی: عەلی تویج، بەڕێوەبەری ڕاگەیاندنی بەرگریی شارستانی نەجەف ڕایگەیاند، لە ناوچەی ئەبو سخەیەری باشووری نەجەف سەقفی چێشتخانەیەک داڕماوە بەهۆیەوە کرێکارێک بەسەختی برینداربووە، لێکۆڵینەوەش لە هۆکاری ڕووداوەکە دەستیپێکردووە و گەڕانیش بۆ ڕزگارکردنی خەڵکی دیکە کە ڕەنگە لە شوێنی ڕووداوەکەبووبن بەردەوامە.

باکگراوند: ئەم ڕووداوە لە کاتێکدایە، دوێنێ ئێوارە لە سەر ڕێگای بەغدا - کەربەلا پردێک لە قۆناغی دروستکردنی داڕما. لەماوەی دوو مانگدا لە دوو پارێزگای عێراق بەهۆی خراپی کوالێتییەوە دوو پرد داڕماون، زستانی ڕابردووش دیمەنی تێکچوونی پردێک لە بەغدا بڵاوکرایەوە.