کارمەندانی تەندروستیی سلێمانی ڕەوانەی نەخۆشخانەکانی عێراق دەکرێن

ئاڤا نیوز

دەرچووانی بەشە پزیشکییەکانی سنووری پارێزگای سلێمانی، ئەوانەی کە کارامەییان بەرزە، بە هەماهەنگی لەگەڵ بەغدا ڕەوانەی نەخۆشخانە گشتی و تایبەتەکانی ناوەڕاست و خوارووی عێراق دەکرێن، تاوەکو ئێستا سەرووی 200 کەس فۆڕمیان پڕکردووەتەوە.

چیرۆکی سەرەکی: ژمارەیەک کارمەندی تەندروستی کە لە نەخۆشخانە تایبەتەکان کاردەکەن لەڕێگەی سەندیکای پەرستارانی کوردستان – لقی سلێمانی، بەهۆی لێهاتوویان دەبرێنە نەخۆشخانە گشتی و تایبەتەکانی عێراق، پڕکردنەوەی فۆڕم و دامەزراندیان بەشێوەی ئارەزوومەندانە دەبێت.

لێدوانی فەرمی: هاوژین عوسمان، سەرۆکی سەندیکای پەرستارانی کوردستان – لقی سلێمانی؛ بە ئاڤای گوت، "جگە لە کارمەندانی بەشی تاقیگە، لەسەرجەم بەشەکانی دیکە کارمەند داواکراون، سەرووی 200 کەس فۆڕمیان پڕکردووەتەوە، لە قۆناغی یەکەم 75 کەس دەبردرێن."

ئەمەش بزانە: ئەو کارمەندانە بەشێوەی ئارەزوومەندانە دەتوانن بەشێوەی کاتی یان بەردەوام لەو نەخۆشخانانە بمێننەوە، دەرچووانی پەیمانگە و کۆلێژ دەگرێتەوە، کەمترین مووچەیان یەک ملیۆن دینار دەبێت.