وەزارەتی ناوخۆی کوردستان: بەپێی دەستوور بەڕێوەبردنی گومرگ دەسەڵاتی هاوبەشە

ئاڤا نیوز

گفتوگۆکانی نێوان هەرێمی کوردستان و حکومەتی فیدراڵی عێراق دەربارەی گومرگ و تۆماری کۆمپانیاکان بەردەوامن، ڕاوێژکاری وەزارەتی ناوخۆی هەرێمی کوردستان دووپاتی دەکاتەوە بەپێی دەستوور بەرێوەبەردنی گومرگ دەسەڵاتی هاوبەشە و بڕیارەکەی عێراق بۆ سیستمی یەکگرتووی گومرگ پێچەوانەی دەستوورە.

وێنە گەوەکە: یەکێک لە كێشەکانی نێوان هەرێمی کوردستان و عێراق بابەتی سیستمی گومرگە، حکومەتی فیدراڵی بڕیاریداوە سیستمی ئەسیکۆدا کە لە عێراق کاری پێدەکرێت ببێتە سیستمی یەکگرتوو، هەرێمی کوردستانیش داوا دەکات سیستمی گومرگی هەرێمی کوردستان بمێنێتەوە و هەردوو سیستمی بەیەکتر ببەسترێنەوە.

لێدوان فەرمی: د. سامی جەلال، ڕاوێژکاری وەزارەتی ناوخۆی هەرێمی کوردستان کە هاوکات سەرۆکی شاندی هەرێمی کوردستانە بۆ بابەتی گومرگ و دەروازە سنوورییەکان، بە ئاڤا میدیای گوت: هەردوو شاندی حکومەتی هەرێمی کوردستان و حکومەتی فیدراڵی ڕیککەوتوون لە سەر سیستمی دیجیتالی تۆماری کۆمپانیاکان، کۆمپانیاکانی عێراق بە نۆ ژمارەیی تۆمار بکرێن و کۆمپانیاکانی هەرێمی کوردستان بە 14 ژمارەیی تۆمار بکرێن.

هەر کۆمپانیایەکی هەرێمی کوردستان لە هەرێمی کوردستان چالاک بێت، لە هەرێمی کوردستان باج دەدات و ناسنامەی باجی بۆ ڕێکدەخرێت، پێوسیت ناکات لە عێراق باج بدات، ئەو کۆمپانیایانەشی لە باشوور و ناوەڕاست چالاک بن ،باج و ناسنامەی باجی لە عێراق دەبێت.

د. سامی جەلال ئەمانەشی گوت:

عێراق بڕیاریداوە تا 2025-12-01، سیستمی ئەسیکۆدا لە هەموو عێراق جێبەجێ بکرێت، ئێمەش داوامان کردووە سیستمی گومرگی هەرێمی کوردستان وەک خۆی بمێنێتەوە و ئالوگۆڕی زانیاری لە نێوانمان هەبێت.

٠ سیستمی گومرگی هەرێمی کوردستان زۆر لە سیستمی ئەسیکۆدا پێشکەوتووترە، بارکۆد و QRـی هەیە و هەموو زانیارییەکانی لەخۆگرتووە.

٠ بەپێی دەستوور بەڕێوەبردنی گومرگ دەسەڵاتی هاوبەشە و بڕیاری تاک لایەنەی حکومەتی فیدراڵی عێراق  پێچەوانەی دەستوورە.

٠ ڕێککەوتن کراوە بۆ هەناردەکردنی بەرهەمی ناوخۆی هەرێمی کوردستان بۆ باشوور و ناوەڕاست بۆ ئەم مەبەستە ڕێککەوتن لە نێوان هەردوو بەڕێوەبەرایەتی گەشەپێدانی پیشەسازیی عێراق و هەرێمی کوردستان کە ئاڵوگۆڕی زانیاری لە نێوانیان بکەن و هەردوولاش دان بە پشنکنینەکانی کوالێتی کۆنترۆڵی یەکتر بنێن.