ئاڤای خەڵک؛ ئاڤا کێشەی کارەبای نەخۆشخانەیەکی تایبەت چارەسەر دەکات

ئاڤا نیوز

نەخۆشخانەیەکی تایبەت لە هەولێر، لە ڕێگەی ئاڤاوە کێشەی نەبوونی کارەبای نیشتمانی دەگەیێنێت، بەڕێوەبەری گشتیی کارەبای هەولێریش دەڵێت، "لەچەند ڕۆژی کەمی داهاتوو کارەبای ئەو نەخۆشخانەیە چارەسەر دەبێت."

چیرۆکی سەرەکی: سەرپەرشتیاریی نەخۆشخانەیەکی تایبەت لە هەولێر، لەڕێگەی ئاڤاوە نووسراوی ڕێکارە یاساییەکانی ڕاکێشانی کارەبای نیشتمانی ناردووە، داوا دەکات لە ڕێگەی ئاڤاوە بەدواداچوون بۆ کێشەکەی بکرێت، بەهۆی ئەوەی ماوەیەکی زۆرە ڕێکارەکانی جێبەجێکردووە، بەڵام کارەبای پێنەگەیشتووە.

زانیاریی بەدەستهاتوو: سەرپەرشتیاریی ئەو نەخۆشخانەیە دەڵێت، سێ ساڵ و نیوە ئەو نەخۆشخانەیەم کردووەتەوە، تاوەکو ئێستا کارەبای نیشتمانیم نییە، هەموو ڕێکارەکانم جێبەجێکردووە ماوەتەوە سەر ئەوەی کارەبام پێبگات، بەڵام تاوەکو ئێستا پێم نەگەیشتووە.

لێدوانی فەرمی: بەختیار قاسم، بەڕێوەبەری گشتی كارەبای هەولێر؛ بە ئاڤای گوت، "دواکەوتنی ڕاکێشانی کارەبای نیشتمانی بۆ ئەو نەخۆشخانە تایبەتە، بۆ تەواونەبوونی چەند ڕێکارێکی تەکنیکی دەگەڕێتەوە، بەڵام هیچ کێشەیەکی نییە، لەماوەی 10 ڕۆژی داهاتوو کارەبای نیشتمانی پێدەگات."