لەسەر فەرمانی سوودانی لیژنەیەکی باڵا بۆ لێکۆڵینەوە لە مردنی شێخ قەرەغولی پێکدەهێنرێت

ئاڤا نیوز

فەرماندەیی ئۆپەراسیۆنە هاوبەشەکانی عێراق ڕایدەگەینێت، لیژنەیەکی لێکۆڵینەوە بە سەرۆکایەتیی فەرماندەیی ئۆپەراسیۆنەکانی بەغدا و ئەندامێتی وەزارەتی ناوخۆ و دەزگای ئاسایشی نیشتمانی لەسەر فەرمانی محەممەد شیاع سوودانی، سەرۆکوەزیران و فەرماندەی گشتی هێزە چەکدارەکان پێکهێنراوە، بۆ لێکۆڵینەوە لە بارودۆخی مردنی ئیمام و وتارخوێنی مزگەوت، شێخ عەبدولستار قەرەغولی.

چیرۆکی سەرەکی: هەینی 12-9-2025، مامۆستایەكی ئایینی بەناوی شێخ عەبدولستار قەرەغولی،  پێشنوێژ و وتارخوێنی مزگەوتی كەریم ناسڕ لە ناوچەی دۆرەی باشووری بەغدا، لەناو مزگەوتەكە لەلایەن چەند كەسێكەوە هێرشی كرایەسەر و بەهۆیەوە گیانی لەدەستدا.

ڕاگەیێنراوی فەرمی: بەگوێرەی ڕاگەیێنراوی فەرماندەییەکە، فەرمانەکە جەختی لەسەر "خێراکردن لە ئاشکراکردنی ڕاستییەکان و گرتنەبەری ڕێوشوێنی یاسایی دژی هەموو ئەو کەسانەی تێوەگلاون، بە مەبەستی ڕەوانەکردنیان بۆ دادگا بۆ دڵنیابوون لە دابینکردنی دادپەروەری" کردووەتەوە.

- سوودانی، بەپێی ڕاگەیێنراوەکە، دووپاتیکردووەتەوە "حکومەت سازش ناکات لە لێپرسینەوە لە هەر لایەنێک کە لێکۆڵینەوەکان کەمترخەمی یان تێوەگلانی لە ڕووداوەکەدا بسەلمێنێت"، جەختیشی لە "گرتنەبەری ڕێوشوێنی یاسایی پێویست دژی هەر کەسێک کە کەمترخەمییەکەی بەپێی ڕێنماییە کارپێکراوەکان بسەلمێنرێت" کردووەتەوە.

ئەوەی پێویستە بیزانیت: وەزارەتی ناوخۆی عێراق دوێنێ هەینی ڕایگەیاندبوو ژمارەیەک لە تۆمەتبارانی کوشتنی شێخ قەرەغولی دەستگیرکراون، لەکاتێکدا سەرچاوەیەکی ئەمنی ئاماژەی بەوەدابوو کە پێش مردنی، ناکۆکییەکی زارەکی لەگەڵ نوێژخوێنان دروستبووە.