"بەرەی مقاوەمەی عێراق" بە درۆن هێرشێک دەکاتە سەر ئیسرائیل

ئاڤا نیوز

"بەرەی مقاوەمەی عێراق" بە درۆن هێرشێک دەکاتە سەر شاری ئیلاتی ئیسرائیل و میدیاکانی ئەو وڵاتەش دەڵێن بنکەیەکی سەربازی کراوەتە ئامانج.

ڕاگەیێنراوی فەرمی: گرووپی چەکداری "مقاومەی ئیسلامیی عێراق" ڕایگەیاند: "بەیانی ئەمڕۆ دووشەمە شوێنێکی گرنگیان لە ئیسرائیل کردووەتە ئامانج، بەردەوامیش دەبن لەسەر هێرشەکانیان".

لەلایەکی دیکەوە: سوپای ئیسرائیل لە ڕاگەیێنراوێکدا ئاماژەی بەوە داوە، دوای هێرشەکە زەنگی ئاگەدارکردنەوە لە شاری ئیلات لێدراوە، ئامانجێکی ئاسمانی گوماناوییان دەستنیشان کردووە کە لە ڕۆژهەڵاتەوە بەرەو خاکی ئیسرائیل هاتووە.

زانیاریی زیاتر: بەپێی میدیاکانی ئیسرائیل هێرشە درۆنییەکە بنکەیەکی سەربازی لە شاری ئیلات کردووەتە ئامانج، جگە لە زیانی ماددی هیچ زیانێکی گیانی نەبووە.

ئەوەی پێویستە بیزانیت: لەگەڵ دەستپێکردنی جەنگی ئیسرائیل و حەماس، گرووپە چەکدارەکانی عێراق وەک پشتگیری لەغەززە دەیان جار بنکە و بارەگایەکانی ئەمریکا لە عێراق و سووریا کردووەتە ئامانج، بەڵام ئێستا هێرشی سەر ئەمریکای ڕاگرتووە و ناو بەناو فڕۆکەی بێفڕۆکەوان و مووشەک ئاراستەی ئیسرائیل دەکات.