عەبادی: بایکۆتی هەڵبژاردنمان نەکردووە و پشتیوانیی سوودانی دەکەین

ئاڤا نیوز

حەیدەر عەبادی، سەرۆکوەزیرانی پێشووتر و سەرۆکی هاوپەیمانیی نەسر ڕایگەیاند، بایکۆتی هەڵبژاردنیان نەکردووە، بەڵکو تەنیا کاندیدیان نییە بۆ هەڵبژاردنەکە هاوکات ئاشکرای کرد کە پشتیوانی لە محەممەد شیاع سوودانی دەکەن بۆ ئەوەی بۆ خولێکی دیکە ببێتەوە سەرۆکوەزیران.

وێنە گەورەکە: بڕیارە لە سەرەتای مانگی 11ـی ئەمساڵ، هەڵبژاردنی پەرلەمانی عێراق بکرێت، محەممەد شیاع سوودانی، سەرۆکوەزیرانی ئێستا بۆ هەڵبژاردنەکە خۆی کاندید کردووە و هاوپەیمانی نەسریش کە عەبادی سەرۆکایەتی دەکات، پاڵپشتی بۆ سوودانی دەربڕیوە.

ڕاگەیێنراوی فەرمی: حەیدەر عەبادی، سەرۆکی هاوپەیمانیی نەسر ڕایگەیاند: هاوپەیمانیی نەسر بایکۆتی هەڵبژاردنەکانی نەکردووە، تەنیا کاندیدی بەناوی هاوپەیمانیەتییەکە نییە، بەڵام هەندێک لە ئەندامانمان وەک بەشێک لە هاوپەیمانی هێزەکانی دەوڵەت کە عەممار حەکیم سەرۆکایەتیی دەکات بەشداری لە هەڵبژاردنەکاندا دەکەن، ئێمەش بە دەنگ پشتگیریان دەکەین. هەڵبژاردنی پەرلەمان لە وادەی دیاریکراودا بەڕێوەدەچێت، نزیکین لە ئاراستەکانی سوودانی، سەرۆکوەزیرانی عێراق و پشتیوانیی دەکەین جارێکی دیکە ببێتەوە سەرۆکوەزیران.

عەبادی لەبارەی سەرۆکوەزیرانەوە وتی: سوودانی یەکەم سەرۆکوەزیرانە لە ناوخۆی عێراقەوە، نەک لە دەرەوەی وڵاتەوە هاتبێتەوە، وردە وردە بۆ ئەم پۆستە بەرزبووەوە، لە قایمەقامیەت بۆ پارێزگار، پاشان وەزیر پێش ئەوەی ببێتە ئەندامی پەرلەمان و دواجاریش بوو بە سەرۆکوەزیران".

زانیاریی زیاتر: هاوپەیمانیی نەسر لە کۆتایی مانگی حوزەیرانی ئەمساڵ ڕایگەیاند کە بەشداری هەڵبژاردنی پەرلەمانی داهاتوو ناکات، لەبری ئەوە پشتیوانی هاوپەیمانی هێزەکانی دەوڵەتی نیشتمانی بە سەرۆکایەوتیی عەممار حەکیم دەکات،هۆکاری بەشدارینەکردنی دەگەڕێتەوە بۆ " بەکارهێنانی سامانی گشتی بۆ بەرژەوەندیی تایبەت، ڕێگرینەکردن لە کڕینی دەنگ و دەستوەردانی دەرەکی".