ئاگرێکی گەورە لە سنووری هەورامان کەوتووەتەوە و تا ئێستا کۆنتڕۆڵ نەکراوە

ئاڤا نیوز

ئاگرێکی گەورە لە ناوچەی هەورامانی سەر سنووری نێوان عێراق و ئێران کوەوتووەتەوە، و پەڕیوەتەوە بۆ دیوی ئێران، هەرچەندە ئێران ئاگرەکەی لای خۆی کۆنترۆڵکردووە، بەڵام لە سنووری هەرێمی کوردستان تا ئێستا کۆنترۆڵ نەکراوە.

چیرۆکی سەرەکی: کاتژمێر 2ـی پاشنیوەڕۆی ئەمڕۆ، ئاگرێکی گەورە لە نزیک گوندی دزڵی هەورامان، لە بەشی ئێرانی سنووری عێراق و ئێران کەوتەوە. ئاگرەکە بە خێرایی بڵاوبووەوە و سنوورەکانی عێراقی بەزاند، بەتایبەتی گەیشتە شاخەکانی پشت گوندی یاڵانپێ لە هەورامانی هەرێمی کوردستان.

لە کاتێکدا کە ئاگرەکە لە لایەنی ئێرانەوە کۆنتڕۆڵ کراوە و کوژاوەتەوە، بەڵام لە سنووری هەرێمی کوردستانەوە، تیمەکانی ئاگرکوژێنەوەی خورماڵ ناتوانن نزیکی ئاگرەکە ببنەوە. هۆکاری ئەمەش دەگەڕێتەوە بۆ بوونی مین لە ناوچەکە و سەختی و ناڕێکی ڕێگاکانی.

لێدوانی فەرمی: بنکەی بەرگریی شارستانیی خورماڵ بە ئاڤای ڕاگەیاند،  بە وردی چاودێری دۆخەکە دەکەن و چاوەڕێ دەکەن تا ئاگرەکە بگاتە شوێنێک کە دەستیان پێی بگات و بتوانن دەست بە هەوڵەکانی کوژاندنەوەی بکەن.

لەلایەکی دیکەوە: دانیشتووانی سنووری هەورامان خۆیان ئامادە دەکەن تا سبەی وەک خۆبەخش بچنە نزیک ئاگرەکە و یارمەتی تیمەکانی ئاگرکوژێنەوە بدەن لە کۆنترۆڵکردن و کوژاندنەوەیدا.