سوودانی: بەرەنگاری هەر هەوڵێک بۆ نانەوەی ئاژاوە دەبینەوە

ئاڤا نیوز

سەرۆکوەزیرانی عێراق دەڵێت، حکومەتەکەی کار بۆ هەڵبژاردنێکی بێگەرد و ئارام دەکات و دامەزراوەکانی دەوڵەتیش بەرەنگاری هەر هەوڵێک بۆ نانەوەی ئاژاوە دەبنەوە.

وێنە گەورەکە: لەگەڵ نزیکبوونەوەی هەڵبژاردنی پەرلەمانی عێراق کە کەمتر لە دوو مانگی ماوە، مشتوومڕی دواخستنی هەڵبژاردن و دروستبوونی پشێویی لە تۆڕە کۆمەڵایەتییەکان دەستاودەستی پێدەکرێت، لەگەڵ ئەوەشدا حکومەت جەخت لە ئارامی دۆخەکە و بەڕێوەچوونی هەڵبژاردن دەکاتەوە.

لێدوانی فەرمی: محەممەد شیاع سوودانی، سەرۆکوەزیرانی عێراق لە بەغدا بەشداریی لە ئاهەنگی دەرچوونی خولێکی گەشەپێدانی کارگێڕیی و ئەمنیی کرد و باسی لەوەشكرد، حکومەت پابەندە بە بەڕێوەبردنی هەڵبژاردنێکی بێگەرد و ئارام، لەهەمان کاتیشدا دامەزراوەکانی دەوڵەت ڕووبەڕووی هەر هەوڵێک بۆ نانەوەی ئاژانەوە دەبنەوە.

زانیاریی زیاتر: سوودانی باسی لەوەشکرد، گەندەڵی دارایی و کارگێڕی مەترسیدارترین ئاستەنگین و کاری لەپێشینەی حکومەتیش بەرەنگاربوونەوەی ئەو دوو جۆرەی گەندەڵییە.