سەرۆکوەزیران مەسرور بارزانی سێ بڕیاری گرنگ لە بەرژەوەندی پێشمەرگە دەدات

ئاڤا نیوز

سێ بڕیار لە بەرژەوەندیی پێشمەرگە دران، داواش دەکرێت مووچەیان زیاد بکرێت و لەگەڵ سوپای عێراق هاوتا بکرێت.

چیرۆکی سەرەکی: ئەمڕۆ مەسرور بارزانی، سەرۆکوەزیرانی کوردستان سەرپەرشتی کۆبوونەوەیەکی تایبەت بە پێشمەرگەی کردووە، بۆ بەدواداچوونی ڕێکار و هەنگاوەکانی یەکخستنی هێزەکانی پێشمەرگە و چاکسازییەکانی وەزارەتی کاروباری پێشمەرگە.

زانیاریی زیاتر: مەسرور بارزانی دەستخۆشی لەو پێشکەوتنانە کردووە کە تا ئێستا لە پرۆسەی چاکسازییەکانی پێشمەرگە کراون، جەختیشی لە پێویستیی تەواوکردن و سەرخستنی پرۆسەکە کردووەتەوە، لەمبارەیەوە ژمارەیەک بڕیاری گرنگ بۆ خێراترکردنی چاکسازییەکان دراون: 

یەکەم: بۆ یەکەمجار بڕیار دراوە تەنها یەک یەکەی دارایی هاوبەشی پێشمەرگە هەبێت. دەبێت هەموو یەکە ژمێریارییەکان یەک بخرێن و بکرێنە یەک یەکە، ئەویش لە چوارچێوەی وەزارەتی پێشمەرگە و لەژێر سەرپەرشتیی وەزارەتی دارایی و ئابووری کوردستان بێت.

دووەم: بڕیاری ڕێکخستنەوەی پێکهاتە و پەیکەربەندیی هێزەکانی پێشمەرگە دراوە بە جۆرێک لەگەڵ چاکسازییەکانی حکومەت بگونجێت.

سێیەم: ئاسانکاریی بکرێت بۆ ڕاییکردنی معامەلاتی پێشمەرگە خانەنشینکراوەکان و پێویستە بەرژەوەندی پێشمەرگە لەبەرچاو بگیرێت.

پەیوەست بەم بابەتەوە: جگە لەم سێ بڕیارە مەسرور بارزانی لایەنە پەیوەندیدارەکانی ڕاسپاردووە پەلە بکەن لە ڕاییکردنی معامەلاتی پێشمەرگە خانەنشینکراوەکان و جەختی کردووەتەوە، نابێت کێشە یاسایی و تەکنیکیەکان ببنە ڕێگر لەبەردەم خەرجکردنی مووچە و شایستەکانیان. 

لەلایەکی دیکەوە: لە مانگی حەوتی ساڵی ڕابردووەوە نزیکەی 27 هەزار پێشمەرگە خانەنشینکراون، زۆربەشیان خانەنشینی نوێن و لە سەرەتای ئەمساڵەوە خانەنشینکراون، بەڵام ساڵێک و دوو مانگە هیچ مووچەیەکیان وەرنەگرتووە، واتا چ ئەوانەی ساڵی پار خانەنشین بوون چ ئەوانەی سەرەتای ئەمساڵ مووچەیان بۆ نەبەستراوە.

زانیاریی تایبەت: بەپێی زانیارییەکانی ئاڤا مەسرور بارزانی لە کۆبوونەوەی ئەمڕۆ تووڕە بووە و گوتوویەتی دەبێت بەزووترین کات کێشەکەیان چارەسەر بکرێت. 

هەر لە کۆبوونەوەی ئەمڕۆ، داوا لە حکومەتی عێراق کراوە  مووچە و شایستە داراییەکانی پێشمەرگە لەگەڵ هاوتاکانیان لە سوپای عێراق یەک بخرێت، چونکە بەپێی دەستوور پێشمەرگە بەشێکە لە سیستەمی بەرگری عێراق و پێویستە مافە دەستووری و شایستە داراییەکانیان لەم چوارچێوەیەدا بێت.