بەرپرسێکی کورد لە بەغدا: حکومەتی عێراق لە پرسی مووچە تەنیا كات دەكوژێت

ئاڤا نیوز

 

بەختیار حاجی، بەڕێوەبەری گشتیی كاروباری پەیوەندییەكان و بەدواداچوونی نوێنەرایەتیی حكومەتی هەرێمی كوردستان لە بەغدا دەڵێت، ئەوەی بەغدا سەبارەت بە مووچەی فەرمانبەرانی هەرێمی كوردستان داوا لە هەولێر دەكات، لە دەرەوەی دەستوور و یاسایە.

 

وێنە گەورەكە: تاوەكوو ئێستا كێشەی هەولێر و بەغدا سەبارەت بە مووچەی فەرمانبەرانی هەرێمی كوردستان چارەسەر نەكراوە، دوو لەمپەر لەبەردەم چارەسەركردنی گرفتەكە هەیە یەكێكیان هەناردەكردنەوەی نەوتە كە چارەسەركردنەكەی لە هەنگاوەكانی كۆتاییە و لەمپەری دووەمیان داهاتی نانەوتیی هەرێمی كوردستانە كە ئێستا ئەنجوومەنی وەزیرانی عێراق بابەتەكەی داوەتە ئەنجوومەنی دەوڵەت و داوای بۆچوونی سەبارەت بە ماددە یاساییەكانی تایبەت بە داهاتی نانەوتی دەكات، ئەگەری زۆر هەیە كە بۆچوونێكی ئەرێنیی ئەنجوومەنەكە ئەو گرفتەش چارەسەر بكات.

 

لێدوانی فەرمی: بەختیار حاجی لە لێدوانێكیدا بە ئاڤا میدیای ڕاگەیاند: ئه‌وه‌ی به‌غدا داوای ده‌كات به‌رامبه‌ر به‌ ناردنی مووچه‌ له‌ ده‌ره‌وه‌ی ده‌ستوور و یاساكانی بودجە و كارگێڕیی دارایی و بڕیاری دادگای فیدراڵییه‌.

-هەرچەندە دادگای فیدڕاڵی بڕیاری داوە بابەتی مووچە تێكەڵی ململانێی سیاسی نەكرێ بەڵام بەغدا بە بیانووی دیكە كێشەی بۆ مووچە دروست كرد.

لەلایەكی دیكەوە: بەپێی گوتەی بەڕێوەبەری گشتیی كاروباری پەیوەندییەكان و بەدواداچوونی حكومەتی هەرێمی كوردستان، دوایین هه‌وڵی به‌غدا بۆ خۆدزینه‌وه‌ و كوشتنی كات بۆ ناردنی مووچه‌ی مووچه‌خۆرانی هه‌رێمی كوردستان داواكردنی ڕای ئه‌نجوومه‌نی ده‌وڵه‌ت بوو، كه‌ دوور و نزیك ئه‌م بابه‌ته‌ ناچێته‌ چوارچێوه‌ی كار و ده‌سه‌ڵاتی ئه‌م ئه‌نجوومه‌نه‌ و بەڵكوو ئه‌م بابه‌ته‌ له‌ لایه‌ن دادگای فیدراڵییەوە یه‌كلاكراوه‌ته‌وه‌ له‌ به‌رژه‌وه‌ندی هه‌رێمی كوردستان.