مردنی "باوکی مووشەک"ـی حیزبی بەعس ڕاگەیێنرا

ئاڤا نیوز

 

شەوی ڕابردوو مردنی عامر محەممەد ڕەشید، وەزیری پێشووتری نەوتی عێراق و یەکێک لە ڕاوێژکارە دیارەکانی سەددام حوسێن، ڕاگەیێنرا، ناوبراو بەهۆی شارەزایی لە پیشەسازیی سەربازییدا بە "باوکی مووشەک" ناوی دەرکردبوو.

 

وێنە گەورەکە: عامر محەممەد ڕەشید لە ساڵی 1995 تا 2003 وەزیری نەوتی عێراق و پێشتریش سەرۆکی دەستەی زانستی و گەشەپێدانی سەربازی بووە، ساڵی 2003 لەلایەن ئەمریکییەکانەوە دەستگیرکرا و ساڵی 2012ش ئازاد کرا، لەو کاتەشەوە تا مردنی لە عەممانی پایتەخی ئوردن دەژیا.

 

ڕاگەیێنراوی فەرمی: حیزبی "گردبوونەوەی نیشتمانیی عێراق" و ئەفسەرانی سەردەمی بەعس بە چەندین ڕاگەیێنراوی جیایان لەبارەی مردنی عامر محەممەد ڕەشید بڵاوکردەوە و دەڵێن، ناوبراو لە تەمەنی 86 ساڵیدا لە عەممان کۆچی دوایی کردووە، بەهۆی شارەزایی و دەستکەوتەکانیشی لە ئەندازیاریی سەربازیی و دروستکردنی مووشەکدا بە "باوکی مووشەک" ناویان هێناوە.

 

ئەمەش بزانە: عامر محەممەد ڕەشید ساڵی 1939 لە بەغدا لەدایکبووە و بڕوانامەی دکتۆرای لە ئەندازیاریی ئەلیکترۆنی لە بەریتانیا بەدەستهێناوە.