مەرجێک بۆ بەڵێندەرانی کەرکووک دادەنرێت؛ بۆ وەرگرتنی ڕەزامەندی هەر پرۆژەیەک دەبێت هەزار دار بچێنن

ئاڤا نیوز

 

وەک هەوڵێک بۆ بەرزکردنەوەی ڕێژەی سەوازیی لە کەرکووک، هەر بەڵێندەرێك پڕۆژەیەک لە شارەکە جێبەجێ بكات دەبێت هەزار دار بچێنێت.

وێنە گەورەکە: شاری کەرکووک یەکێکە لەو شارانەی عێراق کە ڕێژەی سەوزایی زۆر کەمە و بەپێی داتاکان ڕێژەی سەوزایی شارەکە لە ٪3 یە، ئەمە لە کاتێکدایە ژمارەیەکی زۆری کێڵگەی نەوت لە پارێزگای کەرکووک هەن.

 

لێدوانی فەرمی: دلێر شوانی، بەڕێوەبەری پەیوەندییەکانی پارێزگای کەرکووک بە ئاڤا میدیای گوت: ژمارەیەک هەنگاومان گرتووەتەبەر بۆ بەرزکردنەوەی ڕێژەی سەوازیی لە شارەکە، هەڵمەتێکمان دەستپێکردووە بۆ چاندنی 20 هەزار نەمام، هەر بەڵێندەرێکیش لە کەرکووک گرێبەستی پرۆژەی بۆ بکرێت و بودجەی پرۆژەکە لە ملیارێک دینار زیاتر بێت، دەبێت هەزار دار لە شارەکە بچێنێت، بۆ ئەم مەبەستەش چەند شوێنێکمان بۆ دەستنیشان کردوون.

 

خاڵە ئەرێنییەکان: جێبەجێکردنی ئەم بڕیارە و بەردەوام بوون لەسەری دەبێتە هۆی بەرزکردنەوەی ڕێژەی سەوزایی لە شارەکە.

 

ئەمەش بزانە:  کەرکووک، یەکێکە لە ناوچە کوردستانییەکانی دەرەوەی ئیدارەی هەرێمی کوردستان، دانیشتوانەکەی زیاتر لە ملیۆنێک و 200 هەزار کەسە، لە پێشوودا خاوەنی چەندین باخچە و دارستانی گەورە بووە وەک: عەرەفە، عاشوور، ئوم ڕەبیعەین و چەندانی تر، بەڵام لە دەیەکانی ڕابردوودا بەشێکی زۆری ئەم ڕووبەرە سەوزاییانە لەناوچوون.