جوان عەبدوڵڵا: ناردنی بابەتی داهاتی نانەوتی بۆ ئەنجوومەنی دەوڵەت بیانوو گرتنە

ئاڤا نیوز

ئەندامێکی پەرلەمانی عێراق دووپاتی دەکاتەوە بۆ ڕێککەوتنی هەولێر و بەغدا لێکنزیکبوونەوە هەیە، ئەگەر ڕێککەوتنەکانیش بکرێن و وەک خۆی جێبەجێ بکرێن نابێت هیچ مووچەیەک بفەوتێت.

چیرۆکی سەرەکی: حکومەتی هەرێمی کوردستان و حکومەتی عێراق لەسەر هەناردەکردنەوەی نەوتی هەرێمی کوردستان گەیشتوونەتە ڕێککەوتن و هیچ گرفتێک لە بەردەم ئەو بابەتە نەماوە، لەسەر بابەتی داهاتی نانەوتیش چاوەڕێی وەڵامی ئەنجوومەنی دەوڵەت دەکرێت.

لێدوانی فەرمی: د. جوان عەبدوڵڵا، ئەندامی پەرلەمانی عێراق لە لیژنەی مافی مرۆڤ بە ئاڤا میدیای گوت: دەربارەی نەوت و داهاتی نانەوتی لێکنزیکبوونەوەی باش هەیە و حکومەتی هەرێمی کوردستان نیازپاکی خۆی نیشانداوە بڕیاریدا پێش یەکلاییکردنەوەی دۆسیەکە بەشێوەی فەرمی نەوت ڕادەستی عێراق بکرێت.

زانیاریی زیاتر: ئەو ئەندامە لەبارەی داهاتی نانەوتی وتی، ناردنی بابەتی داهاتی نانەوتی بۆ ئەنجوومەنی دەوڵەت بیانوو گرتنە و بۆ کات کوشتنە، چونکە ئەم بابەتە لە دەستوور و یاسای بودجە بە ڕوونی یەکلایی کراوەتەوە. وەڵامی ئەنجوومەنی دەوڵەت ڕاوێژکارییە و پابەندکار نیە.

ئەگەر وەڵامی ئەنجوومەنەکە لە بەرژەوەندی هەرێمی کوردستان نەبێت و حکومەتی عێراقیش بڕیاری لەسەر بدات، هەرێمی کوردستان دەتوانێت بابەتەکە بباتە دادگای فیدراڵی و سکاڵا تۆمار بکات.

د. جوان عەبدوڵڵا ئەمانەشی گوت:

٠ دادگای فیدراڵی پێشتر بڕیاری داوە نابێت مووچە تێکەڵی پرسە سیاسییەکان بکرێت.

٠ ئەگەر دوو ڕێککەوتنەکە بکرێن و وەک خۆی جێبەجێ بکرێن هیچ شتێک نامێنێت بۆ ئەوەی مووچەی فەرمانبەران بفەوتێت.

٠ ئەوەی تێبینی دەکرێت و ئاماژەکان بۆ ئەوەن لە عێراقەوە زیاتر لە مووچەیەکی فەرمانبەرانی هەرێمی کوردستان ڕەوانە نەکرێت، لە بەرامبەردا هەموو هەوڵەکانی حکومەتی هەرێمی کوردستان بۆ ئەوەیە هیچ مووچەیەک نەفەوتێت.