شایستە داراییەکانی گەنمی جووتیارانی کوردستان دابەش دەکرێت

ئاڤا نیوز

دوای گەیشتنی چەکی شایستە داراییەکانی گەنمی جووتیارانی پارێزگاکانی هەرێمی کوردستان لە بەغداوە، ئێستا ڕێکارە بانکییەکان جێبەجێ دەکرێت و لەماوەی چوار ڕۆژی داهاتوو دەست بە دابەشكردنی دەکرێت.

 

وێنە گەورەکە: لە سەرەتای وەرزی هاوینەوە جووتیارانی هەرێمی کوردستان گەنمیان ڕادەستی سایلۆکان کردووە، بەڵام بەهۆی کەمتەرخەمی وەزارەتی بازرگانیی عێراق لە پاییزدا ئەو جووتیارانەی لە سەرەتاوە گەنمیان ڕادەستکردووە پارەکانیان وەردەگرن، بڕیارە بەچەند قۆناغێک پارەکە خەرج بکرێت.

 

لێدوانی فەرمی: هێمن سەید موراد، بەڕێوەبەری کشتوکاڵی هەولێر بە ئاڤای گوت، "ئەگەر ئەمڕۆ ڕێکارە بانکییەکان تەواو بکرێن، سبەی دەست بە دابەشکردنی شایستە داراییەکانی جووتیاران دەکرێت، بەگوێرەی ئەو گەنمەی ڕادەستیان کردووە پارەکانیان خەرج دەکرێت."

 

ئەمەش بزانە: پشکی هەرێمی کوردستان لە پارەی گەنمی ئەمساڵ 310 بۆ 315 ملیار دینارە، لەم قۆناغەدا 57 ملیار دینار نێردراوە، 20 ملیار بۆ هەولێر، 25 ملیار بۆ سلێمانی و هەڵەبجە و 12 ملیار دیناریش بۆ جووتیارانی دهۆک تەرخانکراوە.