ڕەزامەندی لەسەر خەرجکردنی پاداشتی خانەنشینی درا

ئاڤا نیوز

 

ئەنجوومەنی وەزیرانی هەرێمی کوردستان ڕەزامەندی لەسەر خەرجکردنی پاداشتی خانەنشینی دا و لەگەڵ خەرجکردنی مووچەی مانگی حەوت دەست بە دابەشکردنی دەکرێت.

 

چیرۆکی سەرەکی: ڕۆژی 21-9-2025، ئەنجوومەنی وەزیرانی هەرێمی کوردستان نووسراوی ژمارە (11631)ی ئاراستەی وەزارەتی دارایی و ئابووری کردووە، تێدا هاتووە کە ڕەزامەندی لەسەر خەرجکردنی پاداشتی خانەنشینی هەولێر و دهۆک دراوە.

 

لەلایەکی دیکەوە: بەگوێرەی نووسراوەکەی ئەنجوومەنی وەزیران، ڕەزامەندی لەسەر خەرجکردنی 57 ملیار و 287 ملیۆن و 906 هەزار و 145 دینار، وەک پاداشتی خانەنشینی کۆتایی ڕاژە قۆناغ بە قۆناغ دراوە و ئەمەش بەپێی هەبوونی نەختینە لە بانکە بازرگانییەکان. 

 

زانیاریی زیاتر: ئەو خانەنشینانەی 180 ڕۆژ مۆڵەتی کۆکراوەیان هەیە و وەریان نەگرتووە، مووچەی شەش مانگیان پێدەدرێت، واتە شەش مووچەی بنەڕەتی ئیکرامیە و پارەکەش لەسەر داهاتی ناوخۆی کوردستان خەرج دەکرێت.

 

زانیاریی بەدەستهاتوو: 17 هەزار خانەنشینی پارێزگاکانی هەولێر و دهۆک مابوون شەش مووچەکە وەربگرن. ئێستا ڕەزامەندی بۆ خەرجکردنی مووچەی ئەوانیش دراوە، لەگەڵ مووچەی مانگی حەوت دەست بە دابەشکردنی دەکرێت، لە چەند مانگی داهاتووداشدا سەرجەمیان وەریدەگرن.

 

ئەوەی پێویستە بیزانیت: لە مانگەکانی ڕابردوودا لە سنووری پارێزگاکانی سلێمانی و هەڵەبجە دەست بە خەرجکردنی شەش مووچەی ئیکرامیە کرا و زۆرینەیان وەریگرت، لە هەردوو پارێزگاکەدا 10 هەزار خانەنشین هەیە، زیاتر لە حەوت هەزاریان وەریان گرتووە.