پێشەوا هەورامانی: لە 48 کاتژمێری داهاتوودا کێشە تەکنیکییەکانی بەردەم هەناردەکردنەوەی نەوت چارەسەر دەکرێن

ئاڤا نیوز

 

گوتەبێژی حکومەتی هەرێمی کوردستان دووپاتی دەکاتەوە لە 48 کاتژمێری داهاتوو هەناردەکردنەوەی نەوتی هەرێمی کوردستان دەستپێدەکاتەوە و لەسەر داهاتی نانەوتیش لەگەڵ بەغدا لێکنزیکبوونەوە هەیە و دانوستان بەردەوامە.

 

چیرۆکی سەرەکی: ئەمڕۆ چوارشەممە 24-9-2025 ئەنجوومەنی وەزیرانی هەرێمی کوردستان کۆبووەوە، تێدا گفتوگۆی ڕێککەوتنی سێ قۆڵی و هەناردەکردنەوەی نەوتی هەرێمی کوردستان کرا، دواتر لە کۆنگرەیەکی ڕۆژنامەوانیدا، وتەبێژی حکومەتی هەرێمی کوردستان ناوەڕۆکی کۆبوونەوەکەی ئەنجوومەنی وەزیرانی هەرێمی کوردستانی بۆ ڕۆژنامەنووسان ئاشکرا کرد.

 

لێدوانی فەرمی: پێشەوا هەورامانی گوتەبێژی حکومەتی هەرێمی کوردستان لە کۆنگرەیەکی ڕۆژنامەوانیدا گوتی: توانای بەرهەمهێنانی نەوت گەیشتووەتە 234 هەزار بەرمیل، ئەوەی بۆ پێداویستی ناوخۆ بەکاردێت لای خۆمان دەیهێڵینەوە، بەشی کۆمپانیاکان و ئەوە بەشەی هەناردە دەکرێت نووسراومان کردووە بۆ ئەوەی کۆمپابیای سۆمۆ نەوتەکە وەربگرێت.

 

ئەوەی پێویستە بیزانیت: پێشەوا هەورامانی پێشبینی دەکات، "لە ماوەی 48 کاتژمێر کێشە تەکنیکییەکان چارەسەر ببن و نەوت هەناردە بکرێتەوە".

 

زانیاریی زیاتر: لە بەشێکی دیکەی قسەکانیدا وتەبێژی حکومەتی هەرێمی کوردستان باسی بودجەی هەرێمی کوردستانی کرد و وتی، بۆ ساڵی 2026 دەچینە گفتوگۆی وەرگرتنی بودجەی هەرێمی کوردستان، چونکە مافی هەرێمی کوردستان تەنیا مووچە نییە.

 

- ڕێککەوتنی سێقۆڵیمان لەسەر نەوت کردووە و هەنگاوی زۆرباشی بڕیوە، تێبینی یەک دوو کۆمپانیا هەبوو، بەڵام ئەمە کێشەیەکی گەورە نییە، بەربەست بۆ هەناردەکردنی نەوت دروست ناکات.

 

- حکومەتی هەرێمی کوردستان لە دەستپێکی کێشەکان نیەتی چارەسەرکردنی هەبووە و دەیەوێت کێشەکان بە یاسا و لە چوارچێوەی دەستوور چارەسەر بکرێن و دەمانەوێت دەستوور بنەما بێت.

- ئامادەیین ئەرک و پابەندی یاسایی و دەستووری جێبەجێ بکەین و دەستبەرداری مافەکانی خەڵک و هەرێمی کوردستان نابین.

 

-ڕێککەوتنی نەوت بۆ سێ مانگە و دواتر دەچینە گفتوگۆی بودجەی ساڵی 2026، چونکە بۆ ساڵی نوێ یاسایەکی نوێی بودجە ئامادە دەکرێت.

- دەربارەی داهاتی نانەوتی، کەشێکی دانوستان و لێکنزیکبوونەوە و لێکتێگەیشتن هەیە.

 

- 120 ملیار دینار بۆ مووچەی مانگی حەوت ڕەزامەندی لەسەر ناردنی دەدرێت، هەرچەندە ئەمە بارگرانی زۆر لەسەر هەرێمی کوردستان دروست دەکات، لە یاسای بودجە ئەم بڕە بۆ هەرێمی کوردستان دیاری نەکراوە، بەڵام لەم قۆناغە گرنگە مووچە زوو بگاتە هاونیشتمانیانمان.

 

- بۆ مووچەی مانگی حەوت وەزارەتی دارایی ئامادەکاری کردووە و لەگەڵ گەیشتنی ڕاستەوخۆ دابەش دەکرێت.

 

- بۆ مووچەی مانگی هەشت لیست ئامادە کراوە و گفتوگۆی ناردنی ئەو مووچەیە دەکەین.