نزیکەی ملیۆنێک و 500 هەزار کرێکاری بیانی لە عێراق کاردەکەن

ئاڤا نیوز

بەپێی ئامارێکی سەندیکاکانی کرێکارانی عێراق، نزیکەی یەک ملیۆن و نیو کرێکاری بیانی لە عێراق کاردەکەن و بەشێکیان تۆڕی تاوانکاری پێکدەهێنن.

لێدوانی فەرمی: وەلید نیعمە، سەرۆکی یەکێتی سەندیکاکانی کرێکاران لە عێراق ڕایگەیاند: بەپێی خەمڵاندنەکانی وەزارەتی کار و کاروباری کۆمەڵایەتی 750 هەزار کرێکاری بیانی لە عێراق هەن، بەڵام ئەو ئامارە زۆر زیاترە و ئێمە پێشبینی دەکەین نزیکەی یەک ملیۆن و 500 هەزار کرێکاری بیانی لە عێراق  هەبن.

زانیاریی زیاتر: کۆمپانیا نەوتییەکان ژمارەیەکی زۆری کرێکاری بیانی بە تایبەت چینی، پاکستانی و بەنگلادیشیان ڕاکێشاوە و لاوازییە یاساییەکان هۆکاری بەرزبوونەوەی ژمارەی کرێکارانی بیانییە، کە بەشێکیان تۆڕی تاوانکاری پێکدێنن و کاری کوشتن و دزی و بازرگانی بە مرۆڤەوە دەکەن.

لەلایەکی دیکەوە: ڕۆژی 31-03-2024، مەزهەر محەممەد ساڵح، ڕاوێژکاری سەرۆکوەزیرانی عێراق ڕایگەیاند: مانگانە 200 ملیۆن دۆلار پارەی كرێكارانی بیانی لە عێراق حەواڵەی دەرەوە دەكرێت، ئەمەش کاریگەری لەسەر ئابووری وڵات و بەهای دۆلار هەیە.

ئەمەش بزانە: ڕۆژی 18-3-2024، وەزارەتی ناوخۆی عێراق بڵاویکردەوە: لە ناوچە جیاوازەکانی بەغدا 555 کەسیان دەستگیرکردووە کە هەڵگری ڕەگەزنامەی جیاوازن و سەرپێچییان لە مەرج و ڕێنماییەکانی نشینگە کردووە.