لە ئامێدی ژمارەیەک مین و تەقەمەنی لەناوبران

ئاڤا نیوز

بەڕێوەبەرایەتیی گشتیی کاروباری مین لە پارێزگای دهۆک ژمارەیەک مین و تەقەمەنییان لە گەلی باڵندە لە قەزای ئامێدی لەناوبرد.

وێنە گەورەكە: لە درێژەی هەوڵە بەردەوامەکان بۆ پاراستنی گیانی هاووڵاتیان و ئاوەدان کردنەوەی ناوچە زیانلێکەوتووەکان و پاراستنی سرووشت و ژینگەی كوردستان، حکومەتی هەرێمی كوردستان، لە کابینەی نۆیەم، کارێکی بەرچاوی بۆ پاککردنەوەی ئەو ناوچانەی بە مین و تەقەمەنییەکان چێنراون، ئەنجام داوە.

لێدوانی فەرمی: شیلان سامر، بەڕێوەبەری گشتی لە بەڕێوەبەرایەتیی گشتیی کاروباری مین لە پارێزگای دهۆک بە ئاڤا میدیای ڕاگەیاند، ئەمڕۆ چوارشەممە 2025-09-24، تیمەکانیان بە هەماهەنگی لەگەڵ کاڤین گرووپ توانییان لە گەلی باڵندە، لە ناحیەی شێلادزێ لە قەزای ئامێدی شەش کێڵگەی مین لەناو ببەن کە ڕووبەرەکەی زیاتر لە 100 هەزار مەتر دووجایە.

شیلان سامر باس لەوەش دەکات، ئەو شوێنەی کە ئەمڕۆ کاریان تێدا کردووە، ڕێگایەکی ستراتیژی لێ دروست دەکرێت و تا دەگاتە دەڤەری نێروە و ڕێکان، هەروەها شوێنەکە دەکرێتە کۆڕنیشی گەشتیاری بۆ ناوچەکە.

زانیاریی زیاتر: بە گشتی لە پارێزگای دهۆک، 779 پارچە زەوی بە مین چێندراو هەن، تا ئێستا 382 ـیان پاک کراونەتەوە و لەڕێگەی پێنج تیم بەردەوام کار دەکرێت بۆ پاککردنەوەی ئەو زەوییانەی کە هێشتان پاک نەکراونەتەوە.

ئەوەی پێویستە بیزانیت: پێشتر دەزگای گشتیی كاروباری مین لە هەرێمی كوردستان ئاشكرای کرد، لە ماوەی كابینەی نۆیەمی حكومەتی هەرێمی كوردستاندا، زیاتر لە 11 ملیۆن و 373 هەزار و 50 مەتر دووجا زەویی هەرێمی كوردستانیان لە مین و تەقەمەنی پاككردووەتەوە، بە واتای پاككردنەوەی تێكڕای 52 كێڵگەی مین كە ئێستا ڕادەستی خاوەنەكانیان كراونەتەوە.