وتەبێژی هاتووچۆی هەولێر: لە نۆ مانگدا، هەزار و 129 ئۆتۆمبێل بەهۆی پیسكردنی ژینگە دەستیان بەسەرداگیراوە

ئاڤا نیوز

وتەبێژی پۆلیسی هاتووچۆی هەولێر ئاشكرای دەكات، لە ماوەی نۆ مانگدا، بەهۆی دەردانی دووكەڵی ڕەش و پیسكردنی ژینگە، دەست بەسەر هەزار و 129 ئۆتۆمبێلی جۆری بارهەڵگر و ئاسایی گیراوە و تیمەکانیش بەردەوامن لە چاودێریكردنی شەقامەكان بۆ ئەم مەبەستە.

وێنە گەورەكە: لەپێناو پاراستنی تەندروستیی هاووڵاتیان و پاكڕاگرتنی ژینگەی كوردستان و چارەسەركردنی كێشەی پیسبوونی كەشوهەوای هەولێر، ڕۆژی 2024-12-12، بە سەرپەرشتی سەرۆكوەزیران مەسرور بارزانی، كۆبوونەوەیەكی تایبەت بە چارەسەركردنی پیسبوونی كەشوهەوای هەولێر بەڕێوەچوو، تێیدا چوار بڕیاری گرنگ بۆ پاككردنەوەی ژینگەی شارەكە دران، لەوانەش؛ داخستنی پاڵاوگە نایاساییەكان، ڕێگریكردن لە لێخوڕینی ئەو ئۆتۆمبێلانەی دووكەڵی ڕەش و گازی ژەهراوی دەردەن، كوژاندنەوەی مۆلیدەکان و ڕێگریكردن لە بەكارهێنانی ئاوی پیس و ئاوەڕۆكان بۆ ئاودانی سەوزە و ئاودێری.

لێدوانی فەرمی: عەقید هێمن ئەمین، وتەبێژی پۆلیسی هاتووچۆی هەولێر تایبەت بە ئاڤای ڕاگەیاند، هەر لە دەرچوونی بڕیاری قەدەغەكردنی هاتووچۆی ئەو ئۆتۆمبێلانەی دووكەڵی ڕەش و گازی ژەهراوی دەردەدەن، لە ماوەی 9 مانگدا، بەڕێوەبەرایەتیی هاتووچۆی هەولێر دەستی بەسەر هەزار و 129 ئۆتۆمبێلی جۆری بارهەڵگر و ئاسایی گرتووە كە ببوونە هۆكاری پیسبوونی ژینگە.

دووپاتیشی كردەوە، تیمەكانی هاتووچۆی هەولێر بەردەوام چاودێریكردنی شەقامەكان دەكەن، وێڕای ئەوەش بەردەوام پەیامی هۆشیاری بۆ شۆفێران بڵاودەكەینەوە.

هۆكارە زانراوەكان: وتەبێژی پۆلیسی هاتووچۆی هەولێر ئاماژەی بەوەكرد، بەشێك لەو ئۆتۆمبێلانەی دووكەڵی ڕەش دەردەدەن، مۆدێلیان كۆنە، یاخود بزووێنەری ئۆتۆمبێلەكان دووچاری داخووران هاتووە، هەندێكجاریش خراپی كوالێتی سووتەمەنی هۆكارە، ئەو بارهەڵگرانەشی كە بە گازوایل كاردەكەن، پەمپیان كێشەی هەیە، ئەوانە لە هۆكارە سەرەكییەكانن.

ئەوەی پێویستە بیزانیت: لەسەر بنەمای پاكڕاگرتنی ژینگە و ڕێگریكردن لە ڕووداوەكانی هاتووچۆ، هەر ئۆتۆمبێلێك ساڵانە پێویستە پشكنینی مەرجی سەلامەتی و تووندوتۆڵی بۆ بكرێت و لەسەر بنەمای ئەنجامی ئەم پشكنینە ڕێگەی پێدەدرێت لەسەر شەقامەكان لێبخوڕدرێت.