بەشێکی خانەنشینانی هەولێر و دهۆک 13 مووچە بەیەکەوە وەردەگرن

ئاڤا نیوز

ڕەزامەندی لەسەر پاداشتی خانەنشینی کراوە و بڕیارە لەگەڵ مووچەی مانگی حەوت خەرج بکرێت، بەمەش خانەنشینانی هەولێر و دهۆک 13 مووچە بەیەکەوە وەردەگرن.

وێنە گەورەکە: لەماوەی ڕابردوو ئیکرامیەی شەش مووچەی خانەنشینانی سلێمانی خەرجکرا، ئەوانەی هەولێر و دهۆک ماون کە پارەکەیان وەرنەگرتووە، لەگەڵ مووچەی مانگی حەوت پارەکانیان خەرج دەکرێت.

زانیاریی تایبەت: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "بڕیاری خەرجکردنی نزیکەی 57 ملیار و 289 ملیۆن دینار دراوە، تەنیا ماوەتەوە سەر ئەوەی پارەکە خەرج بکرێت، ئەو پارەیە پاداشتی خانەنشینی و جیاوازی مووچەیە کە بڕیارە لەگەڵ مووچەی مانگی حەوت خەرج بکرێت."

زانیاریی زیاتر: بۆ مووچەی مانگی حەوت چوار هەزار خانەنشین، حەوت مووچە بەیەکەوە وەردەگرن، بەڵام ئەوانەی دهۆک و هەولێر بەشێکیان دەبێتە 13 مووچە، چونکە شەش مووچەی ئیکرامیەش وەردەگرن.