لە قەڵای هەولێر 50 دار بە ستانداردی كەلەپووری جیهانی دەچێندرێن

ئاڤا نیوز

لەچوارچێوەی گرنگیدان بە جوانكردنی سیمای قەڵای هەولێر، سەروو 50 داری جۆری ستانداردی كەلەپووری جیهانی لە شەقامی سەرەكی قەڵا دەچێندرێن، لە ئاییندەشدا ژمارەكە زیاتر دەكرێت.

وێنە گەورەکە: نۆژەنکردنەوەی قەڵای هەولێر لە ژێر چاودێریی ڕاستەوخۆی سەرۆكوەزیران مەسرور بارزانی دەكرێت، ئەوەش دوای ئەوەی لەلایەن یونسكۆوە وەك یەكێك لە شوێنەوارە بایەخدارەكانی جیهان پۆلێن كرا و کۆمسیۆنێک بۆ نۆژەنکردنەوەی پێکهات. ئامانجەكە ئەوەیە قەڵای هەولێر ببێتە ڕووگەیەكی گەشتیاریی گرنگ بۆ گەشتیارانی ناوخۆیی و بیانی؛ ئێستا كارەكانی نۆژەنكردنەوەی بەرەو كۆتاییە.

لێدوانی فەرمی: فەلاح حەسەن، سەرۆكی كۆمیسیۆنی باڵای بووژاندنەوەی قەڵای هەولێر بەوەكالەت بە ئاڤای ڕاگەیاند، بۆ گرنگیدان بە ژینگە و جوانترکردنی شەقامی سەرەکیی ناو قەڵا، بە ستاندەردی کەلەپووری جیهانی و بە راوێژکاری لەگەڵ ڕێکخراوی یونسکۆ و بەشی شوێنەواری و ئەندازیاریی كۆمیسیۆنی باڵای بووژاندنەوەی قەڵای هەولێر، وەکو دەستپێک هەڵساین بە چاندنی زیاتر لە 50 دار.

گرنگترین ئەو پرۆژانەی لە ماوەی ڕابردوودا لەنێو قەڵای هەولێر جێبەجێ كراون:

٠ نۆژەنکردنەوەی شەقامی سەرەکیی قەڵا و كۆڵانەكان و بەردڕێژكردنیان بە ستانداردی جیهانیی شوێنەواری كەلەپووری.

٠ نۆژەنکردنەوەی حەمامی قەڵا کە کۆنترین حەمامی هەولێرە و كارەكانی نۆژەنكردنەوەی، لەلایەن حکومەتی ئەمریکاوە پشتیوانیی دارایی دەکرێت.

٠ ڕووناككردنەوەی دیوی دەرەوە و ناوەوەی قەڵای هەولێر و شەقام و كۆڵانەكانی.

٠ نۆژەنكردنەوەی بەشێك لە خانووە گرنگەكانی نێو قەڵای هەولێر.

٠ زیادكردنی ڕووبەری سەوزایی.

٠ نۆژەنكردنەوەی گۆڕەپانی بەردەم دەرگای سەرەکیی قەڵا و بەردڕێژكردنی.

* دانانی تەلبەندی ئەمنی بۆ ئەو شوێنانەی كە ڕێگەپێدراو نییە.

٠ پلانیش هەیە چایخانەیەکی کولتووری و چێشتخانە و هۆتێلێكیش لە قەڵا دروست بکرێن.