پزیشکێکی کورد بە یەكێك لە  10 کاریگەرترین پزیشکی جیهان هەڵبژێردرا

ئاڤا نیوز

ڕێوان حوسێن، پزیشکی پسپۆری تایبەت بە شێرپەنجەی مەمک، وەک کاریگەرترین پزیشکی جیهان و نوێنەری ڕۆژهەڵاتی ناوەڕاست هەڵبژێردرا.

چیرۆکی سەرەکی: کۆلێژی نەشتەرگەرانی ئەمریکی، ساڵانە لە مانگی ئەیلوولدا کە تایبەتە بە ڕۆلی ئافرەت لە بواری پزیشکیدا، چەند پزیشکێکی پسپۆری نەشتەرگەری وەک پزیشکی نموونەیی و کاریگەر هەڵدەبژێرن، بۆ ئەمساڵ 10 پزیشک لەسەرانسەری جیهان هەڵبژێردران کە بۆ یەکەمجارە لەسەر ئاستی کوردستان و وڵاتانی ڕۆژهەڵاتی ناوەڕاست کەسێک هەڵبژێردرێت.

لێدوانی فەرمی: ڕێوان حوسێن بە ئاڤا میدیای ڕاگەیاند، بۆ یەکەمجارە لە ڕۆژهەڵاتی ناوەڕاست و لە کوردستان کەسێک هەڵبژێرن، "ئەو کەسەش من بووم و نوێنەرایەتیی هەموو ڕۆژهەڵاتی ناوەڕاست دەکەم".

دەشڵێت، "هەڵبژاردنەکە وەک ڕێزلێنان و هاندانێکە بۆ ئەو هەوڵ و ماندووبوونانەمان کە چەندە چالاک و کاریگەرین لە کۆمەڵگەدا". لەهەمان کاتدا هاندەرێکیشە بۆ ئەو پزیشکانەی کە تازە کۆلێژی پزیشکییان تەواو کردووە، تاوەکو بێنە بواری پزیشکی بە هەموو بەشەکانییەوە.

ئەوەی پێویستە بیزانیت: ئەو پزیشکانەی کە ساڵانە وەک کاریگەرترین پزیشکی جیهان هەڵدەبژێردرێن، مەرجە ئەندام بن لە هاوەڵی کۆلێژی نەشتەرگەریی ئەمریکی، لەهەمان کاتدا ئەندامێکی چالاک و کاریگەر بن لە ناوچەکە خۆیان کە کاری تێدا دەکەن.

ئەمەش بزانە: ڕێوان حوسێن، پزیشکی پسپۆری نەشتەرگەری شێرپەنجەی مەمکە  و 11 ساڵە لە بوارەکەی خۆی لە شاری هەولێر کار دەکات، لە هەمان کاتدا هاوەڵی کۆلێژی نەشتەرگەرانی ئەمریکایە.