مەسرور بارزانی لەبارەی هەژماری من: ڕوونی و شەفافیەتی لە دابینكردنی مووچە زیاتر كردووە

ئاڤا نیوز

سەرۆكوەزیران مەسرور بارزانی، پەیامێك سەبارەت بە پڕۆژەی هەژماری من و خزمەتگوزاریی بانكی لە هەرێمی كوردستان بڵاو دەكاتەوە و ڕایدەگەیێنێت كە حکومەتی هەرێمی کوردستان، تا کۆتایی ساڵی 2028، خزمەتگوزاریی بانکی لە سەرتاسەری هەرێمی کوردستان، بۆ زیاتر لە 50% بەرز دەکاتەوە.

وێنە گەورەكە: هەژماری من یەكێكە لە پڕۆژە ستراتیژییەكانی كابینەی نۆی حكومەتی هەرێمی كوردستان و ئامانج لێی كۆتاییهێنانە بە دابەشكردنی مووچە بەشێوەی كاش و بە دیجیتاڵیكردنی مووچەی فەرمانبەرانی هەرێمی كوردستان، تاوەكوو ئێستا زیاتر لە 900 هەزار مووچەخۆر لە پڕۆژەكە تۆمار كراون و بۆ ئەم مانگەی زیاتر لە 500 هەزار مووچەخۆر مووچەكانیان بە دیجیتاڵی وەردەگرن.

پەیامی فەرمی: سەرۆكوەزیران مەسرور بارزانی لە پەیامەكەیدا دەڵێت: خۆشحاڵم کە دەبینم زیاتر لە نیو ملیۆن فەرمانبەر و خانەنشینی حکومەتی هەرێمی کوردستان، ئێستا مووچەکانیان بە شێوەی دیجیتاڵی، لە ڕێگەی ئەو بانکانەوە وەردەگرن کە بەشدارن لە پڕۆژەی (هەژماری من).

لە دوای ڕاگەیاندنی پڕۆژەی 'هەژماری من'ـی حکومەتی هەرێمی کوردستان لە ساڵی 2023 ـەوە تا ئێستا، ژمارەی ئەو کەسانەی کە هەژماری بانکییان لە کوردستان هەیە، لە کەمتر لە 5% ـەوە بووە بە زیاتر لە 15%. هەروەها پڕۆژەکە بانکەکانی هانداوە بۆ فراوانکردنی خزمەتگوزاریی تاکەکەسی و زیادکردنی لق و تۆڕەکانی ئامێری ڕاکێشانی پارە و باشترکردنی خزمەتگوزاریی کڕیاران. پارە دانان لە بانکە بەشداربووەکانیش، بەردەوام ڕوو لە زیادبوونە، کە بەم هۆیەوە، قەرزی تاکەکەسی و بازرگانی دەدرێت.

زانیاریی زیاتر: سەرۆكوەزیران مەسرور بارزانی ئاماژەی بە ئەوەش داوە كە تا ئێستا زیاتر لە سێ ملیار دۆلاری مووچەی مووچەخۆرانی هەرێم، لە ڕێگەی بانکە بەشداربووەکانەوە دراوە، ئەمەش هەلی کاری نوێی لە کەرتی خزمەتگوزارییە داراییەکاندا ڕەخساندووە و ڕێگەی بۆ دروستبوونی متمانەی بانکی خۆشکردووە. دەستڕاگەیشتن بە متمانەی بانکی بۆ گەشەپێدانی ئابووری و کۆمپانیا بچووک و ناوەندەکان و تازە دەستپێکردووەکان، زۆر گرنگە، هەروەها هەژماری من، پرۆسەی دابەشکردنی مووچەی حکومەتی هەرێمی کوردستانی ئاسانتر و خەرجکردنیشی خێراتر کردووە و ڕوونی و شەفافییەت لە دابینکردنی مووچەی حکومەتیشدا زیاتر بووە.

لەلایەكی دیكەوە: سەرۆكوەزیرانی هەرێمی كوردستان جەخت دەكاتەوە كە حکومەتی هەرێمی کوردستان، تا کۆتایی ساڵی 2028، خزمەتگوزاریی بانکی لە سەرتاسەری هەرێمی کوردستان، بۆ زیاتر لە 50% بەرز دەکاتەوە.

دەشڵێت: ئەمە هەنگاوێکی گرنگە، بەڵام کاری زۆر زیاتر لە پێشە. بەردەوام دەبین لە کارکردن تاکوو خەڵکی سوود لە خزمەتگوزاریی بانکیی پارێزراو و سەردەمییانە ببینن، ئەمەش بەشێکە لە کارنامەی کابینەی نۆیەمی حکومەتی هەرێمی کوردستان.