لە بانکی کەلار 10 ملیۆن دینار بەهەڵە بە فەرمانگەیەک دەدرێت

ئاڤا نیوز

بەڕێوەبەرایەتی پۆلیسی گەرمیان ڕایگەیاند، کە ئەو بڕە پارەیەی بۆ مووچە لە بانک وەریانگرتووە بڕی 10 ملیۆن دیناری زیاد بووە و بۆ بانکیان گەڕاندووەتەوە.

چیرۆکی سەرەکی: ڕۆژی شەممە 2025-10-04، لیژنەیەک لە بەڕێوەبەرایەتی پۆلیسی گەرمیان مووچەی مانگی حەوتی بەڕێوەبەرایەتییەکەیان لە بانکی کەلار وەرگرتووە، دوای دابەشکردنی بەسەر کارمەندەکانیان، دەرکەوت کە بڕی 10 ملیۆن دینار زیادە، بە نووسراوی فەرمی گەڕاندوویانەتەوە بۆ بانک.

لێدوانی فەرمی: عەلی قدوری، وتەبێژی بەڕێوەبەرایەتی پۆلیسی گەرمیان بە ئاڤای ڕاگەیاند: لیژنەکەمان ئەو 10 ملیۆن دینارەی بەنووسراوی فەرمی بۆ بانکی کەلار گەڕاندەوە، ئەمە یەکەم جار نییە کە پارەی زیاد بۆ بانک بگەڕێنینەوە، پێشتریش چەندینجار پارەی زیادەمان گەڕاندووەتەوە، بەڵام ئەمجارە بڕی پارەکە زیاتر بوو.

وتەبێژەکەی پۆلیسی گەرمیان دەڵێت: ئەرکی پۆلیس پاراستنی سەر و ماڵی هاونیشتمانیانە و بە گەڕاندنەوەی ئەو پارەیەش جارێکی دیکە سەلماندمان بە ئەمەک و دەستپاکین.