دیمەشق و واشنتن تاوتوێی میکانیزمەکانی جێبەجێکردنی ڕێککەوتنی 10ـی ئازار دەکەن

ئاڤا نیوز

سەرۆککۆماری سووریا لەگەڵ شاندێکی باڵای ئەمریکا تاوتوێی میکانیزمەکانی جێبەجێکردنی ڕێککەوتنی 10ـی ئازار لەنێوان حکومەتی دیمەشق و فەرماندەی گشتیی هێزەکانی سووریای دیموکرات دەکەن.

 

وێنە گەورەکە: ڕۆژی 10ـی ئازاری 2025، سه‌باره‌ت به‌ ئایینده‌ی هێزه‌كانی سووریای دیموکرات "هه‌سه‌ده" و گەلی کورد لە باکوری ڕۆژهەڵاتی سووریا، ‌ مەزڵووم عەبدی، فەرماندەی گشتیی هەسەدە و ئەحمەد شەرع، سەرۆککۆماری سووریا بۆ قۆناغی ڕاگوزەر ڕێککەوتنێکیان واژۆ کرد.

 

چیرۆکی سەرەکی: سێشەممە 2025-10-7، ئەحمەد شەرع، سەرۆککۆماری سووریا پێشوازی لە تۆم باراک، نێردەی تایبەتی ئەمریکا بۆ سووریا و ئەدمیراڵ براد کووپەر، فەرماندەی فەرماندەیی ناوەندی ئەمریکا کرد، کۆبوونەوەکە بە ئامادەبوونی ئەسعەد شەیبانی، وەزیری دەرەوە - مورهەف ئەبو قەسرە، وەزیری بەرگری و حوسێن سەلامە، سەرۆکی دەزگای هەواڵگریی گشتیی سووریا بەڕێوەچوو.

 

بڵاوکراوەی فەرمی: بەگوێرەی ئاژانسی فەرمیی سووریا، لەمیانی کۆبوونەوەکەدا، دوایین گۆڕانکارییەکانی گۆڕەپانی سووریا، ڕێگاکانی پشتگیریکردنی پرۆسەی سیاسی و بەهێزکردنی ئاسایش و سەقامگیری و هەروەها تاوتوێی میکانیزمەکانی جێبەجێکردنی ڕێککەوتنی 10ـی ئازار کران، بە شێوەیەک کە یەکپارچەیی خاکی سووریا و سەروەرییەکەی بپارێزێت.

 

ئەوەی پێویستە بیزانیت: دوای شەڕ و پێکدادانەکەی شەوی ڕابردووی نێوان هەسەدە و سوپای سووریا لە حەلەب، ئەمڕۆ سێشەممە شاندێکی ئیدارەی خۆسەر بە سەرۆکایەتیی مەزڵووم عەبدی بەمەبەستی ئەنجامدانی کۆبوونەوەیەک لەگەڵ ئەحمەد شەرعی سەرۆکی سووریا گەیشتە دیمەشق.