سەرۆکوەزیران بارزانی: هەوڵ دەدەین پێش جەژن مووچەی مانگی سێ دابەش بکرێت

ئاڤا نیوز

سەرۆکوەزیران بارزانی ڕایدەگەیێنێت، لەگەڵ حکومەتی عێراق چارەسەری گونجاو بۆ کێشەی خەرجکردنی مووچە دانراوە، جەختیش دەکاتەوە لە هەوڵدان بەر لە جەژن مووچەی مانگی سێ دابەش بکرێت.

وێنە گەورەکە: دوای بڕیاری دادگەی فیدراڵی لەبارەی مووچە، سەرۆکوەزیران بارزانی بەردەوام لەگەڵ سوودانی لەسەر هێڵ بوو بۆ چارەسەرکردنی پرسەکە، ئەمڕۆش مژدەی چارەسەرکردنی ڕاگەیاند.

ڕاگەیێنراوی فەرمی: سەرۆکوەزیران مەسرور بارزانی دەڵێت، دوای هەوڵ و کۆششێکی زۆر، بە هاوکاریی هەردوو تیمی هەولێر و بەغدا توانرا چارەسەرێکی گونجاو بۆ کێشەی خەرجکردنی مووچەی فەرمانبەران و مووچەخۆرانی هەرێم دابنرێت.

لەلایەکی دیکەوە: سەرۆکوەزیران بارزانی سوپاسی محەممەد شیاع سوودانی، سەرۆکوەزیرانی عێراق و هەموو ئەو هێز و لایەنانه دەکات کە هاوکار بوون بۆ زاڵبوون بەسەر کۆسپ و تەگەرەکاندا.

زانیاریی زیاتر: لەم دوو ڕۆژەدا دابەشکردنی مووچەی مانگی شوبات کۆتایی دێت و هەوڵ دەدرێت بەر لە جەژن، دەست بە دابەشکردنی مووچەی مانگی ئادار بکرێت.

پێدراوە ڕاستەکان: سەرۆکوەزیران بارزانی بە جەختکردنەوە لەوەی لە ماوەی ڕابردوودا هەوڵی زۆر دراوە هاووڵاتیانی هەرێمی کوردستان نائومێد بکرێن، جارێکی دیکە سوپاسی خۆڕاگریی فەرمانبەران و مووچەخۆران دەکات.