وەزارەتی تەندروستی لەبارەی شێرپەنجەی مەمک هۆشداریی دەداتە خانمان

ئاڤا نیوز

وەزارەتی تەندروستیی هۆشداریی بە ئافرەتان دەدات؛ پشکنین و دەستنیشانکردنی پێشوەختەی شێرپەنجەی مەمک چارەسەری و چاکبوونەوە ئاسانتر دەکات.

وێنە گەورەکە: شێرپەنجەی مەمک یەکێک لە بەربڵاوترین جۆرەکانی شێرپەنجەیە لە جیهاندا، هەر بۆیە ساڵانە مانگی ئۆکتۆبەر تەرخاکراوە بۆ هەڵمەتی هۆشیاریی دەربارەی ئەم جۆرەی شێرپەنجەیە، لە هەرێمی کوردستانیش چەندین چالاکی بۆ ئەم مەبەستە ئەنجام دەدرێن.

لێدوانی فەرمی: چنار سنجاوی، بەرپرسی کۆنترۆڵی شێرپەنجە لە وەزارەتی تەندروستی هەرێمی کوردستان بە ئاڤا میدیای گوت: ئەگەر شێرپەنجەی مەمک زوو دەستنیشان بکرێت 95%ی تووشبوان بە ڕێژەی 100% چاکدەبنەوە، بۆیە هۆشیاری دەربارەی ئەم نەخۆشییە و پشکنین پێشوەختە زۆر گرنگە.

ئەوەی پێویستە بیزانیت: لە هەولێر سەنتەری تایبەت بۆ پشکینی پێشوەختە کراوەتەوە و پشکنینی شێرپەنجەی مەمک لەلایەن 13 پزیشکی پسپۆڕەوە بۆ هاووڵاتیان ئەنجام دەدرێت، هاووڵاتیان دەتوانن سەردانی سەنتەرەکە بکەن، حەوت پزیشکی پسپۆڕی نەشتەرگەریی و شەش پزیشکی پسپۆڕی سۆنار، ڕۆژانە پشکنینی هاووڵاتیان دەکەن و چارەسەریان پێدەدەن.