ئاوات شێخ جەنگی لەڕێگەی ئاڤا ڕوونکردنەوەیەک ڕەت دەکاتەوە کە بە ناوی بنەماڵەکەیان بڵاوکراوەتەوە

ئاڤا نیوز


بنەماڵەی لاهوور شێخ جەنگی ڕوونکردنەوەیەک ڕەت دەکەنەوە کە بەناوی ئەوان لەبارەی گردبوونەوەکەی ئەمڕۆی بەردەم بارەگای نەتەوە یەکگرتووەکان لە هەولێر بڵاوکرایەوە.

چیرۆکی سەرەکی: پێشنیوەڕۆی ئەمڕۆ بەشێک لە سەرکردە و ئەندامانی بەرەی گەل، لەبەردەم بارەگای نەتەوەیەکگرتووەکان لە هەولێر گردبوونەوە، بە ئامانجی فشار دروستکردن لەسەر دادگا و نوێنەرایەتیی وڵاتان لە کوردستان، بۆ ئازادکردنی لاهوور شێخ جەنگی و دەستگیرکراونی دیکە، دواتر  ڕوونکردنەوەیەک بە ناوی بنەماڵەی شێخ جەنگی بڵاوکرایەوە و ئاماژە بەوە کرابوو "هەندێک کەس بەمەبەست هەندێک دروشم و وێنە و لافیتەیان بەرزکردبووەوە، ئەمە زیاتر دەستێکی سیاسیی و ئەمنیی لەپشتە وەک لەوەی هەوڵێک بێت بۆ ئازادکردنی دەستگیرکراوەکان"، ئاوات شێخ جەنگی، خوشکە گەورەی لاهوور شێخ جەنگیش لەڕێگەی ئاڤاوە ڕەتی دەکاتەوە ڕوونکردنەوەکە هی ئەوان بێت.

لێدوانی فەرمی: ئاوات شێخ جەنگی بە ناوی بنەماڵەی شێخ جەنگییەوە بە ئاڤای گوت: ئەو ڕوونکردنەوەیەی بە ناوی ئێمە بڵاوکراوەتەوە ڕاست نییە و ئاگادار نین، تەنانەت لە ئایندەش ئێمە هیچ ڕوونکردنەوەیەکی وا نادەین، پارێزەرەکانیش ڕادەسپێرم ڕوونکردنەوە بۆ ڕەتکردنەوەی بدەن و سكاڵاش لەسەر ئەو کەسانە تۆمار بکەن کە بڵاویان کردووەتەوە.

 

لەلایەکی دیکە؛  بورهان ڕەشید گوڵە، سەرۆکی تیمی پارێزەرانی داکۆکیکار لە لاهوور شێخ جەنگی و گیراوانی لالەزار، کە هاوکات سەرۆکی لیستی بەرەی گەلە لە سلێمانی، ڕوونکردنەوەیەکی بڵاو کردەوە و تیایدا هاتووە، "ئەمڕۆ شەممە 2025/10/18 ڕوونکردنەوەیەک بڵاو کراوەتەوە لە پەیج و ئەکاونتی (RANG) بەناوی (ڕوونکردنەوەیەک لە بنەماڵەی شیخ جەنگی) دوای ئەوەی بنەماڵەی شیخ جەنگی پەیوەندیان پێوە کردم. بەرێزیان داوایان کرد. ڕوونکردنەوەی پێویست لەو بارەیەوە بدەم.  کە ئەوان لە دوورو نزیک ئاگاداری ئەو ڕوونکردنەوەیە نین."

سەرۆکی تیمی پارێزەرانی داکۆکیکار لە لاهوور شێخ جەنگی هیوادارە "کەسە پەیوەندیدارەکان ئەم کێشەیە   بەشێوەیەکی عادلانە  لە ڕەگ و ڕیشەوە چارەسەر بکەن و کۆتایی بە ناکۆکیەکان بهێنن چونکە ئەوە لە بەرژەوەندیی هەموولایەکدایە و زامنی چاکبوونەوەی برینەکانە".

دەقی ئەو ڕوونکردنەوەیەی بە ناوی بنەماڵەی شێخ جەنگی بڵاوکراوەتەوە و ڕەتی دەکەنەوە هی ئەوان بێت:

ڕوونکردنەوەیەک لە بنەماڵەی شێخ جەنگی

ئەمڕۆ لەبەردەم بارەگای UN لە شاری هەولێر، ژمارەیەک کەس کە خۆیان وەک لایەنگر و کادیری بەرەی گەل دەناسێنن گردبوونەوە و بە قسەی خۆیان و بەپێی ئەو دروشمانەی بەرزیانکردبوەوە داوای ئازادکردنی لاهور شێخ جەنگی و پۆڵاد شێخ جەنگی و چەکدارە دەستگیرکراوەکانی لالەزار دەکەن.

ئێمە لەوە تێدەگەین کە ژمارەیەک کەس وەک دڵسۆزیی و وەفا بۆ شێخ لاهور و شێخ پۆڵاد بەشداریان لەو گردبوونەوەیە کردبوو، بەڵام لە بەرزکردنەوەی هەندێک دروشم و وێنە و لافیتە تێگەیشتین کە ئەمە زیاتر دەستێکی سیاسیی و ئەمنیی لەپشت بێت وەک لەوەی هەوڵێک بێت بۆ ئازادکردنی دەستگیرکراوەکان.

ئێمە و پارێزەرەکانی دۆسیەکە لە نزیکەوە ئاگاداری دۆخی دەستگیرکراوەکانین و چەند جارێک چاومان پێکەوتون لە نزیکەوە، بەڵێنی ئەوەمان وەرگرتووە یاسا لەم کەیسەدا سەروەربێت بۆیە لە ئێستادا بێدەنگیمان هەڵبژاردووە و هیچ کەس و لایەنێکیش نوێنەرایەتی ئێمە ناکات.

لەکاتی پێویستدا ڕوونکردنەوەی زیاتر دەدەین.

بنەماڵەی شێخ جەنگی 

18/10/2025