دەم پارتی ئازادکردنی دەمیرتاش بە گرنگترین هەنگاو بۆ سەرخستنی پرۆسەی ئاشتی دەزانێت

ئاڤا نیوز

هاوسەرۆکانی دەم پارتی، ئازادکردنی سەڵاحەددین دەمیرتاش، فیگەن یوکسەکداغ و زیندانییانی دیکەی دۆسیەی کۆبانێ بە گرنگترین هەنگاو دەزانن بۆ سەرخستنی پرۆسەی ئاشتی.

چیرۆکی سەرەکی: ئەمڕۆ  یەکشەممە 19-10-2025 تونجەر باکرهان و تولای هاتیمئۆغوڵڵاری، هاوسەرۆکانی گشتیی دەم پارتی سەردانی دەمیرتاشیان کرد کە نزیکەی نۆ ساڵە زیندانی کراوە لە زیندانی ئەدرینە.

لێدوانی فەرمی: هاوسەرۆکانی دەم پارتی بە ئاماژەدان بەوەی سەڵاحەددین دەمیرتاش، هاوسەرۆکی پێشووتری هەدەپە زۆر گەشبینە بە سەرخستنی پرۆسەی ئاشتی، دەڵێن: هیچ پاساوێک نییە بۆ هێشتنەوەی دەمیرتاش و زیندانییانی دیکەی دۆسیەی کۆبانێ لە زیندان و ئەوان بێتاوانن. دادگای مافی مرۆڤی ئەوروپا بڕیاری ئازادکردنی بۆ دەمیرتاش دەرکردووە، پابەندنەبوون بە بڕیاری ئەو دادگایە، پێشێلکردنی دەستوور و یاسا کارپێکراوەکانی تورکیایە.

بە تەنیشت ئەم بابەتەوە: هاوسەرۆکانی دەم پارتی جەخت لەوە دەکەنەوە لە کاتێکدا باس لە سەرخستنی پرۆسەی ئاشتی و بە دیموکراسیبوونی تورکیا دەکرێت، گرنگترین شت ئەوەیە تورکیا پابەند بێت بە بڕیارەکانی دادگای مافی مرۆڤی ئەوروپا، سەڵا‌حەددین دەمیرتاش و فیگەن یوکسەکداغ و زیندانییانی دۆسیەی کۆبانێ ئازاد بکات.

ئەوەی پێویستە بیزانیت: دوای هەڵگرتنی پارێزبەندی پەرلەمانتاری، دەمیرتاش و فیگەن یوکسەکداغ و حەوت پەرلەمانتاری دەم پارتی و دەیان چالاکوانی سیاسیی دەم پارتی لە 14-11-2016 بە تۆمەتی هاندانی خەڵک بۆ ڕژانە سەرشەقام و 'ئاژاوە نانەوە' و 'پشێوی' لە کاتی گەمارۆدانی کۆبانێ لەلایەن داعشەوە، خرانە زیندان.