پسپۆڕێکی بواری وزە: ڕێككەوتن لەسەر 70%ـی ماددەكانی یاسای نەوت و گاز كراوە

ئاڤا نیوز

پسپۆرێکی بواری نەوت و گاز ڕایدەگەیەنێت، ڕێككەوتن لەسەر 70%ـی ماددەكانی یاسای نەوت و گاز كراوە و ئەوەی دەمێنێتەوە پێویستی بە گفتوگۆ و دانوستانی سیاسی هەیە.

وێنە گەورەكە: یاسای نەوت و گاز دەبووایە لە ساڵی 2007 تەواو بكرێت و لە ئەنجوومەنی نوێنەرانی عێراق دەنگی لەسەر بدرێت، بەڵام بەهۆی ناكۆكی و خەمساردی لایەنە عێراقییەكان، ساڵ لەدوای ساڵ، دەركردنی یاساكە گرفت و بەربەستی بۆ دروستدەكرا، بەهۆیەوە كێشەكانی نێوان هەولێر و بەغدا لەسەر پرسی نەوت سەریهەڵدا.

لێدوانی فەرمی: د. گۆڤەند شێروانی، مامۆستای زانكۆ و پسپۆری بواری نەوت و گاز، تایبەت بە ئاڤا ڕایگەیاند، ڕێككەوتنی هەناردەكردنەوەی نەوتی هەرێمی كوردستان، یارمەتیدەرێكی باش دەبێت بۆ تێپەڕاندنی یاسای نەوت و گاز لە خولی شەشەمی پەرلەمانی عێراق، بەو مەرجەی دەستوەردانی سیاسی نەكرێت.

زانیاریی زیاتر: شێروانی ڕاشیگەیاند، گرفتی گەورەی كێشەی هەولێر و بەغدا لەسەر دۆسیەی نەوت، دەرنەچوونی یاسای نەوت و گازە كە دەبووایە لە ساڵی 2007ـەوە یاساكە پەسەند بكرێت، بەڵام خۆشبەختانە 70%ـی ماددەكانی ڕەشنووسی یاساكە، ڕێككەوتنی لەسەر كراوە، ئەوەی تر پێویستی بە گفتوگۆ و دانووستانی سیاسی هەیە.

لەلایەكی دیكەوە: ئەو پسپۆرە باسی لەوەشكرد، یاسای بوودجەی گشتیی سێ ساڵی عێراق كەموكوڕی زۆری تێدایە و سەرجەمیشی لە زیانی هەرێمی كوردستانە، ئەگەر بابەتە تەكنیكی و داراییەكان ڕاستبكرێنەوە، دەرفەت هەیە لە یاسای بودجەی 2026، ئەو كەموكوڕی و بیانووانە نەهێڵدرێت كە بەغدا كردوویەتی بە هۆكاری سزادانی خەڵكی كوردستان.