ئاڤای خەڵک؛ دانیشتووانی گوندی قەویلە لە سەیدسادق کێشەی ڕێگایان هەیە

ئاڤا نیوز

دانیشتووانی گوندی قەویلە لە ناحیەی سرۆچکی قەزای سەیدسادق کێشەی ڕێگایان هەیە، داوا دەکەن ڕێگاکەیان بۆ چاک بکرێت چونکە هەڵکەوتەی جوگرافی ناوچەکەیان سەختە و ناتوانن بە ئاسانی هاتووچۆ بکەن. 

بەدواداچوونی ئاڤا: ساڵی 2013 بڕی 950 ملیۆن دینار بۆ چاککرانی ئەو ڕێگایە تەرخان کراوە، بەڵام پڕۆژەکە جێبەجێ نەکراوە و خەڵکەکەش دەڵێن پارەکە خوراوە، کۆمپانیای جێبەجێکاریش بەهۆی ئەوەی پارەی وەرنەگرتووە پڕۆژەکەی جێهێشتووە.

زانیاریی زیاتر: درێژی ڕێگاکە حەوت کیلۆمەترە و 10 گوند لە قیرکردنی سوودمەند دەبن، ناحیەی بەرزنجەش بە قەزای سەیدسادق دەبەستێتەوە, بەهۆی هەڵکەوتەی جوگرافی ناوچەکەش کە شاخاوییە، تەنانەت ڕێگاکەمان خۆڵیش نییە و هەمووی بەرد و شاخە و زۆر سەختە.

لێدوانی فەرمی: ڕەزا محەممەد، قایمقامی سەیدسادق دەڵێت: پڕۆژەی قیرکردنی گوندی قەویلە دەگەڕێتەوە بۆ سەردەمی پترۆ دۆلار، لە داهاتی نەوت ڕێگای گوندەکان قیر دەکرا، بەهۆی وەستانی پارەکەش قیرکردنی ڕێگای ئەو گوندە و سەرجەم گوندەکان لە سنووری قەزاکەمان وەستاوە.

دەشڵێت، هیچ لە دەسەڵاتی ئێمە نییە و ئێستا پارە نییە، ئومێدەوارین لە ئایندەیەکی نزیک پارەمان بۆ تەرخان بکرێت، بۆ ئەوەی ڕێگای گوندی قەویلە و سەرجەم گوندەکانی تر قیرتاو بکەین.