زانای غەواس لە دیجلە بەدوای تەرمی گەنجێکی عەرەبدا دەگەڕێت

ئاڤا نیوز

دوای ئەوەی گەنجێکی عەرەب بۆ ماوەی نۆ ڕۆژ لە ئاوی ڕووباری دیجلە لە بەغدا خنکاوە و تیمەکانی فریاکەوتنی ناوچەکە لە دۆزینەوەی تەرمەکەی بێهیوا بوون، خانەوادەکەی پەنایان بۆ توانای غەواسێکی بەناوبانگی کورد بردووە بە ناوی "زانای غەواس" بۆ دەرهێنانەوەی تەرمەکەی.

چیرۆکی سەرەکی؛ زانا، غەواسە شارەزاکەی خەڵکی شارۆچکەی تەقتەق، کە ناوبانگێکی گەورەی لە دۆزینەوەی تەرمی قوربانیانی خنکان لە ڕووبار و دەریاچەکاندا هەیە، دوای پەیوەندی و تکای بەردەوامی کەسوکاری گەنجە خنکاوەکە، ئەمڕۆ سێشەممە گەیشتە بەغدا بۆ ئەوەی دەست بە ئەرکە مرۆییەکەی بکات و تەرمی ئەو گەنجە بدۆزێتەوە.

زانا تاوەکو ئێستا نزیکەی 70  تەرمی لە ئاو دەرهێناوەتەوە و ژیانی زیاتر لە 320 کەسیشی لە خنکان ڕزگار کردووە. ئەم توانایەی زانای غەواس وای کردووە ناوبانگی سنوورەکانی هەرێمی کوردستانی ببڕێت و لە شارەکانی دیکەی عێراقیشدا داوای یارمەتی لێبکرێت. پێشتریش لە تکریت، بەسرا و حەوزی حەمرین کاری گەڕان و دەرهێنانەوەی تەرمی ئەنجامداوە.

 

لێدوانی فەرمی؛ لە لێدوانێکدا بۆ دەروون مەلا ناجی، پەیامنێری ئاڤا نیوز لە بەغدا، زانای غەواس وتی: "بۆ من فەرقی نییە قوربانییەکە عەرەبە یان کورد، من ئەم کارە بۆ ڕەزامەندی خوای گەورە دەکەم."

ئەو لەبارەی چارەنووسی تەرمی گەنجەکەوە وتی: "نۆ ڕۆژە خنکاوە، چاوەڕێ دەکەین سبەی یان دووسبەی تەرمەکەی بکەوێتە سەر ئاو. ئەگەر دەرنەکەوت، ئەوە مانای وایە لە شوێنێک گیر بووە."

لەکاتی دەستپێکردنی کارەکەیدا لە ڕووباری دیجلە، ژمارەیەکی زۆر لە کەسوکاری گەنجە خنکاوەکە و خەڵکی ناوچەکە لە کەناری ڕووبارەکە کۆبوونەوە و بە هیوایەکەوە چاوەڕێی دەست و بازووی غەواسە کوردەکە بوون.

زانای غەواس بە ورەیەکی بەرزەوە وتی: "مەتر بە مەتری شوێنەکە دەگەڕێم و پشتیوان بەخوا تەرمەکەی دەدۆزمەوە."