دوای بەدواداچوونی ئاڤا دەست بە دروست کردنەوەی دووکانەکانی بازاڕی دارەسووتاوەکەی سلێمانی دەکرێت

ئاڤا نیوز

دوای شەش مانگ لە ڕووداوی سووتانی بازاڕی دارەسووتاوەکەی سلێمانی، بڕیارە ڕۆژی شەممە، 25ـی ئەم مانگە، دەست بە دروستکردنەوەی دووکانە سووتاوەکان بکرێتەوە.

چیرۆکی سەرەکی: هەفتەی ڕابردوو ئاڤا بەدواداچوونێکی بڵاوکردەوە سەبارەت بەوەی کە کاسبکارانی بازاڕەکە ماوەی شەش مانگە لە چاوەڕوانی بەڵێنی قەرەبووکردنەوەدان.

لێدوانی فەرمی: بورهان حەمە ئەمین، نوێنەری کاسبکارانی بازاڕی دارەسووتاوەکە، بە ئاڤای ڕاگەیاند کە سەرجەم لایەنە پەیوەندیدارەکان هاتوونەتە سەر هێڵ بۆ دروستکردنەوەی دووکانەکان، بە ئامانجی ئەوەی کاسبکاران چیتر بێکار نەمێنن و بەڵێنی قەرەبووکردنەوەشیان پێدراوە.

ئاماژەی بەوەشدا کە هەر کاسبکارێک بە بڕی یەک ملیۆن دیناری بەشداری کردووە بۆ کڕینی پەناڵەکان. بڕیارە لە ماوەی کەمتر لە مانگێکدا، دووکانە نوێیەکان ڕادەستی خاوەنەکانیان بکرێنەوە، تا بتوانن دەست بە کار و کاسبی خۆیان بکەنەوە.

باکگراوند: لە سەرەتای مانگی چواری ئەمساڵدا، نزیکەی 150 دووکانی بازاڕەکە بەهۆی شۆرتی کارەباوە سووتان.