کاردانەوەکانی تورکیا لەبارەی کشانەوەی هێزەکانی پەکەکە لە تورکیا و باکووری کوردستان

ئاڤا نیوز

بە پێچەوانەی ڕێوڕەسمی چەکدانانی سیمبوولی گرووپێک لە گەریلاکانی پەکەکە، بڕیارەکەی دوێنێی ئەو حیزبە بۆ کشاندنەوەی هێزەکانی لە تورکیا و باکووری کوردستان کەمترین کاردانەوەی لێکەوتووەتەوە، تاوەکوو ئێستا تەنها دوو بەرپرسی ئاک پارتی و یەک وەزیری حکومەتی تورکیا و ڕاوێژکارێکی ئەردۆغان لەمبارەیەوە قسەیان کردووە.

چیرۆکی سەرەکی: وێڕای تێپەڕینی زیاتر لە 24 کاتژمێر بەسەر بڕیاری کشانەوەی هێزەکانی پەکەکە لە تورکیا و باکووری کوردستان وەکوو بەدەمەوەهاتن بۆ بانگەوازەکەی ئۆجەلان و بڕیارەکانی کۆنگرەی 12، کەچی بە پێچەوانەی هەنگاوەکانی دیکەی ئەم ڕێکخراوە بۆ بەرەوپێشبردنی پرۆسەکە، کەمترین کاردانەوەی لە تورکیا لێ کەوتەوە.

زانیاریی زیاتر: خاڵی سەرنجڕاکێش ئەوەیە تاوەکوو ئێستا ڕەجەب تەیب ئەردۆغان، سەرۆککۆماری تورکیا و دەوڵەت باخچەلی، سەرۆکی گشتیی مەهەپە کە هەر خودی پرۆسەی ئەمجارە بە دەستپێشخەریی ئەو دەستی پێ کردووە، هێشتا هیچیان لەمبارەیەوە نەوتووە.

لەسەر ئاستی حزبەکانی تورکیا تەنها گوتەبێژی ئاک پارتی و جێگری سەرۆکی گشتیی هەمان حزب و لەسەر ئاستی حکوومەتیش تەنها وەزیری دادی تورکیا و ڕاوێژکارێکی سەرۆککۆماری تورکیا قسەیان کردووە.

لێدوانی فەرمییەکان: هەر دوای بڕیارەکەی پەکەکە دوێنێ عومەر چەلیک، گوتەبێژی ئاک پارتی'ـی دەسەڵاتدار لە تورکیا ڕایگەیاند ئەم بڕیارە، دەبێتە هۆی بەرەوپێشتربردنی پرۆسەی ئاشتی و بە پێویستیشی زانی پرۆسەی چەکدانان هەسەدەش بگرێتەوە.

ئەفگان ئالا، جێگری سەرۆکی گشتیی ئاک پارتی ئەم بڕیارەی بە کردنەوەی دەرگاکان بە ڕووی پرۆسەی ئاشتیی ناو برد.

- یڵماز تونچ، وەزیری دادی تورکیا ڕایگەیاند لە هەموو کاتێک زیاتر لە سەرخستنی پرۆسەی ئاشتی نزیک بوونەتەوە. هەروەها ئۆکتای ساراڵ، ڕاوێژکاری سەرۆککۆماری تورکیاش بڕیارەکەی پەکەکەی بە "ئەرێنی"ی ناو برد و دواتر هەڕەشەی ئەوەشی کرد کە ئەگەر کارەکە تێک بدرێت، بەس خۆیان دەزانن چی دەکەن. 

بە تەنیشت ئەم بابەتەوە: میدیاکانی تورکیا بەهەمان شێوازی پێشوو، هەمان گوتار و ئاراستەیان بەرامبەر پەکەکە هەیە. ئەمە لە کاتێکدایە میدیاکانی نزیک لە حکومەت بانگەشەی ئەوە دەکەن پەکەکە ناچار بووە "چۆکدا بدات" و ئەم بڕیارە بدات، کەچی بەشێک لە میدیاکانی ئۆپۆزسیۆن بانگەشەی ئەوە دەکەن پەکەکە لە ڕێی ئەو کۆنگرە ڕۆژنامەوانییەوە بەشێک لە هێزەکانی و چەکە هەرە پێشکەوتووەکانی دەستی گەریلاکانی نمایش کردووە و بەمەیش دەیەوێت پەیام بۆ تورکیا بنێرێت. 

ئەوەی پێویستە بیزانیت: ئەمە لە کاتێکدایە کۆبوونەوەی 16ی کۆمیسیۆنە پەرلەمانییەکە 30-10-2025 بە بەشداری وەزیرانی دەرەوە و دادی تورکیا ئەنجام دەدرێت و هەرچەند چاوەڕێ دەکرا 28ی 10 ئەندامانی شاندی ئیمراڵی لەگەڵ ئەردۆغان کۆببنەوە، دوێنێ و دوای بڕیارەکەی پەکەکە کۆبوونەوەکە بۆ ڕۆژی پێنجشەممە دواخرا.